Аввалроқ Қарши шаҳри ҳокими Нормўмин Холбоев ўзини рағбатлантириш учун 75 миллион сўм маблағ ажратиш ҳақида қарор чиқаргани хабар қилинганди. Ҳолат юзасидан Коррупцияга қарши курашиш агентлиги изоҳ берди.
Қайд этилишича, Қарши шаҳар ҳокимининг қарори амалдаги қонунчилик ҳужжатлари талабларига зид тарзда қабул қилинган. Агентлик томонидан коррупцияни келтириб чиқарувчи сабаб ва шарт-шароитларни бартараф этиш чораларини кўриш тўғрисида тақдимнома киритилган.
Тақдимномага асосан, Қашқадарё вилоят ҳокимининг 2023 йил 19 сентябрь кунги қарори билан Қарши шаҳар ҳокимининг ушбу қарори бекор қилинган.
“Мазкур ҳолатда қонун бузилишига йўл қўйган шахсларга тегишли қонуний чора кўриш учун Агентлик томонидан тўпланган ҳужжатлар Бош прокуратура ҳамда Иқтисодиёт ва молия вазирлигига юборилди”, — дейилади агентлик ахборотида.