Қашқадарё вилояти божхона бошқармаси Контрабандага қарши курашиш, божхона аудити бўлими ҳамда вилоят ИИБ ходимлари томонидан тезкор тадбир ўтказилди. Бу ҳақда вилоят ички ишлар бошқармаси ахборот хизмати хабар қилди.
Маълум бўлишича, Қарши шаҳрида жорий йилнинг 6 ноябрь куни соат 05:30ларда Қарши шаҳрида жойлашган "Чебурек" чойхонаси олдида фуқаро Н.А ноқонуний равишда пиротехника воситалари сотаётган вақтида тўхтатиб қолинди.
Қайд этилишича, фуқаро Н.А.га тегишли пиротехника воситалари бошқарма маъмурий биносига олиб келиниб, холислар иштирокида тўлиқ кўздан кечирилганида умумий қиймати 8 миллион 400 минг сўмлик 42 блокдан иборат "Британик" ва “Трения" ёзувли ноқонуний пиротехника воситалари борлиги маълум бўлди.
Шунингдек, тезкор тадбир давомида 13 ноябрь куни Қарши шаҳар Чақар махалласида яшовчи Н.A. Хитой давлатида ишлаб чиқарилган 50 блок “Соловейраз Войник” номли тахминий баҳоси 6 миллион 200 минг сўм бўлган пиротехника воситалари кўчада сотаётган вақтида ушланди.
Айни вақтда ҳар иккала ҳолат бўйича қонуний қарор қабул қилингунга қадар вақтинчалик сақловга олинди.
Эслатиб ўтамиз, аввалроқ Бухорода 8800 дона пиротехника воситаларини ноқонуний равишда сотаётган, Тошкентда “kleksan” дори воситасини ноқонуний муомалага киритаётган шахсларнинг қўлга олингани, ноқонуний дори воситалари манзилига етиб бормагани ҳамда зангиоталик фуқаро 91,5 миллион сўмлик "Ремдесивир" дори воситасини 12 минг долларга сотишга урингани ҳақида хабар берилганди.