Қирғизистон ташқи қарзини бир кунда тўлаш имкониятига эга — Садир Жапаров

 

Қирғизистон Президенти Садир Жапаров мамлакат зарур бўлганда бутун ташқи қарзини бир кун ичида тўлаш имкониятига эга эканини, бироқ бундай қарор иқтисодий жиҳатдан мақсадга мувофиқ эмаслигини маълум қилди. Бу ҳақда у 8-чақириқ Жогорку Кенешининг биринчи йиғилишида сўзлаган нутқида таъкидлади.

 

Давлат раҳбарининг қайд этишича, Қирғизистон иқтисодиёти барқарор ўсиб бормоқда, ташқи қарз даражаси эса сезиларли даражада камайган. Хусусан, 2020 йилда давлат қарзи ялпи ички маҳсулотнинг 54 фоизини ташкил этган бўлса, ҳозирда бу кўрсаткич 25 фоиз атрофида.

 

Президентнинг айтишича, мамлакат иқтисодиёти учун ташқи қарз хавф туғдирмайди. Шу билан бирга, илгари олинган кредитларни муддатидан олдин тўлаш юқори фоиз ставкалари ва жарималар сабабли фойдасиз ҳисобланади. Режаларга кўра, Қирғизистон 2035 йилга келиб аввалги қарз мажбуриятларини тўлиқ ва муаммосиз бажаради.

 

Шунингдек, Садир Жапаров мамлакатнинг олтин-валюта захиралари 8,5 миллиард доллардан ошганини маълум қилди. Таққослаш учун, беш йил аввал бу кўрсаткич 2 миллиард доллардан бироз кўпроқни ташкил этган.

 

Расмий маълумотларга кўра, ҳозирда Қирғизистоннинг умумий давлат қарзи 8,6 миллиард долларни ташкил этади. Шундан қарийб 5,2 миллиард доллари хорижий қарзлардир. Президент иқтисодиёт ўсиш суръати 10 фоизни ташкил этаётганини қайд этиб, бу Қирғизистонни дунёдаги энг тез ривожланаётган учта иқтисодиёт қаторига олиб чиқаётганини таъкидлади. Йил якунига қадар консолидацияланган бюджет ҳажми 1,2 триллион сомга етиши кутилмоқда.