Қозоғистоннинг «KazGrain» экспортчилар миллий ассоциацияси раҳбари Зейнолла Абдуманапов Ўзбекистонга автомобиль орқали буғдой экспортини чеклашни таклиф қилмоқда. Бу ҳақда у ижтимоий тармоқдаги саҳифасида маълум қилди, дея хабар бермоқда APK-Inform нашри.
«Ҳукумат томонидан Россиядан автомобиль йўллари орқали буғдой олиб киришни тақиқлаш чоралари кўрилганига қарамай, яқинда биз Россиядан вагонлар Туркистон вилоятига қандай кириб, ’Камаз‘ларга қайта юкланиб, Ўзбекистонга экспорт қилинаётганига гувоҳ бўлдик. Бу буғдойнинг қандай қонуний равишда экспорт қилинишини ким назорат қилади? Шуни таъкидлаш керакки, бу арзон рус буғдойи Қозоғистон буғдойининг бутун экспортини бузади. Шу муносабат билан ушбу масалани кун тартибига қўйиш ва Қозоғистондан Ўзбекистонга автомобиль орқали буғдой экспортини чеклашни кўриб чиқиш зарур, деб ҳисоблайман», — деди «KazGrain» раҳбари.
APK-Inform нашри хабарига кўра, Қозоғистонда буғдой нархи пасайишда давом этмоқда. Бунга асосий сабаб қилиб экспортчилар томонидан талабнинг пастлиги, шунингдек, мавсумий омиллар кўрсатилган. Қозоғистон қайта ишловчилар иттифоқи маълумотларига кўра, Россия буғдойининг контрабандаси туфайли республика ҳар йили 500 миллион долларга яқин зарар кўради.