Британия аеропортлари ҳаво кемаларини бошқариш билан боғлиқ техник носозликлар туфайли фалажланиб қолди. Бундан эса минглаб йўловчилар жабрланди. Буюк Британия ҳаво ҳаракати миллий хизмати техник носозлик сабаблари аниқланганини билдириб, ноқулайлик учун узр сўради. Аммо узр билан чиппакка чиққан режалар, парвозни кутиб ўтказилган вақт ва асабларни қайтариб бўлмайди.
Хўш, рейсингиз бекор қилингани ёки кечиктирилганида сиз қандай ҳуқуқларга эга эканингизни биласизми?
Халқаро қоидаларга кўра, рейсингиз бекор қилинса, сизга учта танлов ҳуқуқи берилиши керак.
1. Пул қайтарилиши.
2. Йўналиш ўзгартирилиши.
3. Парвоз куни ўзгартирилиши.
Авиакомпания сизни манзилга тезроқ етказиш чорасини кўриши керак, бунинг учун бошқа компания хизматидан фойдаланишга тўғри келса ҳам. Агар энг яқин муддат ва шароитда сизни манзилга етказишнинг имкони бўлмаса, чипта пули қайтарилиши керак. Агар авиакомпания чиптани қайта расмийлаштириш имконини бермаган бўлса ва сиз бошқа чипта сотиб олишга улгурган бўлсангиз, чипталар нархи ўртасидаги фарқ қайтарилиши керак. Шунингдек, самолёт парвозни амалга оширган, аммо аэропортга қайтишга мажбур бўлган ҳолларда ҳам юқоридаги ҳуқуқлар сақланиб қолади. Аммо йўналиш ўзгариши парвоз бекор бўлганини эмас, балки қолдирилганини билдиради. Бундай ҳолда сиз парвоз учун бошқа кунни танласангид бўлади. Авиакомпания эса сизга харажатларни нақд пул ёки ваучер кўринишида кўтариш мажбуриятини олади.
Рейс қолдирилганда нима қилсам бўлади?
Йўловчи ҳуқуқлари рейс қанча муддатга қолдирилгани ва парвоз давомийлигига кўра фарқ қилади. Агар парвоз 2 соатдан кўпроқ вақтга сурилса, ёрдам олишингиз, бу муддат 5 соатдан ошса, компенсация олишингиз мумкин. Авиакомпания йўловчини ичимлик, овқат, жой ва агар зарурат бўлса, тунаш учун жойга боришга трансфер билан таъминлашга мажбур. Шунингдек, сиз текин телефон қўнғироқлари, факс ва электрон почтадан фойдаланишингиз мумкин. Фақат барча харажатлар учун чек сақланган бўлиши керак. Аммо агар авиакомпания рейс бекор бўлиши ёки сурилишида айбдор бўлмаса, компенсация олиш эҳтимоли пасаяди. Масалан, экстремал ҳаво шароити, иш ташлашлар ва бошқа фавқулотда вазиятларда клмпенсация тўланмайди. Аммо авиакомпания айби билан рейс режалаштирилганидан 14 кунгача бўлган муддатда бекор қилинса, компенсация тўланиши керак. 1500 кмгача бўлган масофада бир йўловчи 250 евро, 1500дан 3500 кмгачс бўлган масофада эса 400 еврони ташкил қилади. Масофаси 3500 кмдан узунроқ парвозлар бекор қилинишидан эса 600 евро компенсацияга эга бўлиш мумкин. Парвоздан аввал авиакомпания қоидалари билан танишиб чиқинг, бу ўз ҳуқуқларингизни ҳимоя қилишда ёрдам беради.