Рус генералини ўлдиришда айбланган ўзбекистонлик эркак умрбодга қамалди
Игор Кириллов ва унинг ёрдамчисини портлатиб ўлдириш иши бўйича суд ҳукми эълон қилинди.
Россиялик генерал-лейтенант Игор Кириллов ва унинг ёрдамчиси Иля Поликарповни портлатиб ўлдиришда айбланган Ўзбекистон фуқароси Аҳмаджон Қурбонов умрбод қамоқ жазосига ҳукм қилинди. Шунингдек, суд қарори билан унга 1 миллион рубль миқдорида жарима белгиланди. Бу ҳақда Россия ОАВ, жумладан "РБК" хабар берди.
Мазкур иш доирасида яна бир неча шахслар ҳам жазога тортилди. Портловчи моддаларни етказиб берганликда айбланган Озарбайжон фуқароси Роберт Сафарян 25 йилга қаттиқ тартибли колонияга ҳукм қилинди. Жиноят ижрочисига уй-жой берган ингушетиялик Ботухон Точиев 22 йилга, Рамазон Падиев эса 18 йилга озодликдан маҳрум этилди, уларга 200 минг рубль миқдорида жарима ҳам тайинланди.
Тергов материалларига кўра, портлаш 2024 йил 17 декабрь куни Москванинг Рязан проспектида содир бўлган. Кириллов ва Поликарпов кўп қаватли уй подездидан чиқаётган пайтда портловчи мослама ишга туширилган. Портлаш қурилмаси подезд ёнида турган самокатга жойлаштирилгани айтилмоқда, ҳодиса оқибатида икки киши ҳалок бўлган.
Халқаро ОАВлар портлашда Украина махсус хизматларининг эҳтимолий иштироки ҳақида хабар берган. Украина хавфсизлик хизматидаги манбалар Кирилловни “ҳарбий жиноятчи” сифатида йўқ қилинганини билдирган бўлса, Киев расмийлари террорчилик усулларидан фойдаланмаслигини таъкидлаган. Россия хавфсизлик идораларига кўра эса, жиноятни содир этган шахсга 100 минг доллар мукофот ва Европа Иттифоқига чиқиш ваъда қилинган.
