Шавкат Мирзиёев эски шаҳарда жойлашган маҳаллага борди

 

Бугун, 23 январь куни Ўзбекистон Президенти Шавкат Мирзиёев Тошкент шаҳрининг Олмазор туманида жойлашган Хастимом маҳалласидаги Зарқайнар кўчасига борди. Давлат раҳбари бу ерда ташкил этилган туризм ва хизмат кўрсатиш объектлари фаолияти билан танишди. Президент матбуот хизматининг маълум қилишича, ташриф давомида ҳудудни комплекс ривожлантириш натижалари намойиш этилди.

Қайд этилишича, туризм кам маблағ эвазига кўп иш ўрни яратадиган, аҳоли даромадини оширадиган ва ҳудуд қиёфасини яхшилайдиган муҳим соҳа ҳисобланади. Шу мақсадда Олмазор туманида 447 гектар ҳудудни қамраб олган йирик лойиҳа амалга оширилмоқда. Лойиҳа доирасида 15 та маҳаллани боғлайдиган 6 та кўчада туризм ва хизмат кўрсатиш объектлари барпо этилмоқда. Зарқайнар кўчасида эса тарихий муҳитни сақлаган ҳолда кенг кўламли бунёдкорлик ишлари бажарилган.

Республика буджетидан ажратилган 150 миллиард сўм ҳисобига 576 та хонадон миллий услубда таъмирланди. Шунингдек, 100 нафар тадбиркор томонидан киритилган 166 миллиард сўмлик инвестициялар эвазига 7 та меҳмонхона, 8 та ресторан, 5 та ҳунармандчилик маркази, савдо ва 125 та хизмат кўрсатиш объектлари ташкил этилиб, 1500 нафар фуқаро доимий иш билан таъминланди. Президент янгиланган кўча бўйлаб юриб, аҳоли, туристлар ва ҳунармандлар билан суҳбатлашди.

Давлат раҳбари туризмни ривожлантиришда ҳунармандчилик алоҳида ўрин тутишини таъкидлаб, ҳунармандлар учун шароит яратиш, малакали кадрлар тайёрлаш зарурлигини қайд этди. Шу билан бирга, «Олмазор» инновацион ўсиш ҳудудини ривожлантириш бўйича мастер-режа тақдим этилди. Президент тарихий меросни асраб-авайлаган ҳолда замонавий инфратузилмани ривожлантириш, ҳар бир кўча учун узоқ муддатли режа ишлаб чиқиш ва алоҳида “Эски шаҳар” дастурини яратиш бўйича топшириқлар берди.