Сурхондарё вилоятида “Ҳудудий электр тармоқлари” АЖ “Energ-savdo” филиалининг Олтинсой туман бўлими бошлиғи туман Сув етказиб бериш хизмати бош мутахассиси билан тил бириктириб, электр энергияси бўйича қарздорлиги мавжуд бўлган фермер хўжалигини умумий тармоқка қайта улаб бериш эвазига 5 миллион сўм талаб қилган. Давлат хавфсизлик хизмати ва Бош прокуратура ҳузуридаги Департмент ходимлари ҳамкорлигида ўтказилган тезкор тадбирда улар сўралган пулни олаётган вақтида қўлга олинган. Бу ҳақда Zamon.uz га ДХХ хабар берди.
Фарғона вилоятида эса Ўзбекистон тумани Халқ қабулхонаси етакчи мутахассиси фуқародан 5 миллион сўм олиб, туман Мажбурий ижро бўлимида унинг кредит қарзига оид ижро ҳужжатини танишлари орқали йўқ қилиб беришни ваъда қилган. У ҳам Давлат хавфсизлик хизмати, Иқтисодий жиноятларга қарши курашиш департаменти ва Ички ишлар органлари ходимлари томонидан далиллар билан қўлга олинди.
Мутасадди идоралар маълум қилишича, мазкур шахсларнинг ноқонуний ҳаракатлари юзасидан Жиноят кодексининг тегишли моддаларига биноан жиноят ишлари қўзғатилган. Ҳозирда тергов ҳаракатлари давом эттирилмоқда.
Ҳуқуқни муҳофаза қилувчи органлар аҳолига мурожаат қилиб, коррупциявий ҳаракатларга аралашмаслик ва бундай ҳолатлар ҳақида дарҳол тегишли идораларга хабар бериш зарурлигини эслатмоқда.