Тelegram ва Instagram ижтимоий тармоқларида Давлат божхона қўмитаси номидан сохта саҳифа ва гуруҳлар ташкил этиб, фирибгарлик билан шуғулланган шахслар қўлга олинди. Бу ҳақда Тошкент вилояти Ички ишлар бош бошқармаси матбуот хизмати маълум қилди.
Қайд этилишича, Тошкент вилояти ИИББнинг Ахборот технологиялари соҳасидаги жиноятларга қарши курашиш бошқармаси ҳамда қуйи бўлинмалари томонидан ўтказилган тезкор-қидирув тадбирлари давомида Тelegram ва Instagram'да “Мусодара товарлар” ҳамда “Оптом склад” номлари остида сохта канал ва гуруҳлар очиб, фуқароларнинг пулларини ўзлаштириб келган жиноий гуруҳ фош этилган.
Дастлабки тергов маълумотларига кўра, Андижон вилоятида яшовчи 22–25 ёшдаги 5 нафар шахс жорий йил бошида олдиндан жиноий тил бириктириб, божхона тизими номидан ижтимоий тармоқларда сохта гуруҳлар ташкил қилган. Улар “Божхона қўмитаси админи”, “Ишонч сиз билан” каби ўнга яқин ёлғон аккаунтлардан фойдаланиб, ўзларини тизим ходимлари сифатида таништирган.
Мазкур гуруҳларда маиший техника, музлаткич ва телевизорлар, иситиш қозонлари, ошхона ва болалар мебеллари, турли гаджетлар, жумладан iPhone’нинг сўнгги моделлари, кийим-кечаклар ҳамда аслида мавжуд бўлмаган мотоскутерларгача жуда арзон нархларда таклиф этилган. Тўловлар эса ўзгаларнинг номига расмийлаштирилган банк карталари орқали қабул қилинган.
Натижада жиноий гуруҳ аъзолари жами 60 нафар фуқаронинг ишончига кириб, фирибгарлик йўли билан 117 миллион сўм пул маблағини қўлга киритган. Маҳсулотни талаб қилган ёки мурожаат қилган жабрланувчилар билан алоқа узилиб, улар ижтимоий тармоқларда “қора рўйхат”га киритилган.
Мазкур ҳолат юзасидан Жиноят кодексининг 168-моддаси 3-қисми «б» ва «г» бандлари билан жиноят иши қўзғатилиб, гумонланувчиларга нисбатан қамоқ эҳтиёт чораси қўлланилган. Ҳозирда тергов ҳаракатлари олиб борилмоқда ҳамда фуқароларга етказилган моддий зарарларни қоплаш чоралари кўрилмоқда.