Темур Кападзе Индонезия терма жамоаси бош мураббийи этиб тайинланди
Индонезия футбол федерацияси унинг номзодини расман тасдиқлади, маҳаллий мухлислар эса бу қарорни мамнунлик билан кутиб олган.
Индонезия футбол ассоциацияси Ўзбекистон терма жамоасининг собиқ бош мураббийи Темур Кападзени миллий терма жамоа бош мураббийи этиб тайинлаганини расман эълон қилди. Бу ҳақда ташкилот ўзининг расмий саҳифаларида маълум қилди.
Маҳаллий футбол мухлислари Кападзенинг келишини ижтимоий тармоқларда узоқ вақт давомида кутганини ёзишган. Аввалроқ Темур Кападзе Индонезия терма жамоасини бошқаришга тайёрлигини билдирган ва агар расмий таклиф бўлса, уни мамнуният билан қабул қилишини айтган эди.
Кападзе илгари берган интервьюларида Қозоғистондан расмий таклиф бўлмаганини, бироқ Туркия, Хитой ва Индонезия вариантлари кўриб чиқилганини билдирган. Шунингдек, у Ўзбекистон Суперлигаси клубларидан бирида ишлаш эҳтимоли ҳам борлигини таъкидлаган эди.
Маълумот ўрнида, Темур Кападзе 2025 йил январдан 6 октябргача Ўзбекистон миллий терма жамоасини бошқарган. Бу даврда у 9 та ўйин ўтказиб, 5 та ғалаба ва 4 та дуранг натижаларини қайд этган. Кейинроқ у миллий жамоа мураббийи Фабио Каннаварога ёрдамчи сифатида фаолият юритган.
