Толимаржон ИЭСда 1065 МВт қувватли йирик энергетика лойиҳаси ишга туширилди
Буғ-газ қурилмаси йилига 8 миллиард кВт соат электр энергияси ишлаб чиқаради ва 300 миллион куб метр газни тежайди.
Бугун Халқаро конгресс марказида Президент Шавкат Мирзиёев иштирокида тантанали маросим ўтказилди. Унда Толимаржон ИЭСда замонавий технологиялар асосида қурилган 1065 МВт қувватли буғ-газ қурилмаси расман ишга туширилиши эълон қилинди ва навбатдаги йирик энергетика лойиҳаларига старт берилди. Лойиҳа қиймати 944,87 миллион АҚШ долларини ташкил этади ва мамлакат энергетика тизимида муҳим қадам ҳисобланади.
Қурилиш ишлари 2023 йилда бошланган бўлиб, Испаниянинг Intesa Ingenieria Industrial S.A., Япониянинг Mitsubishi Corporation ва Туркиянинг Çalık Energy каби етакчи компаниялар билан ҳамкорликда амалга оширилди. Лойиҳанинг молиялаштирилиши Осиё тараққиёт банки, Европа тикланиш ва тараққиёт банки ҳамда Ўзбекистон Тикланиш ва тараққиёт жамғармаси кредитлари орқали таъминланган.
Янги буғ-газ қурилмалари йиллик 8 миллиард кВт·соат электр энергияси ишлаб чиқаради ва энерготежамкор технологиялар қўлланилиши натижасида йиллик 300 миллион куб метр табиий газ тежалиши таъминланади. Лойиҳа Самарқанд ва Бухоро вилоятлари истеъмолчилари ҳамда Қарши магистрал каналидаги насос станцияларига барқарор электр таъминоти тақдим этади.
Қурилманинг ишга туширилиши натижасида 200–250 та қўшимча иш ўрни яратилди. Ускуналар Япония, Корея, Хитой ва АҚШда ишлаб чиқарилган бўлиб, тўлиқ автоматлаштирилган бошқарув ва юқори даражадаги энерготежамкорликка эга. Газ турбиналарининг ҳар бири 385 МВт, буғ турбинаси эса 185,7 МВт қувватга эга бўлиб, ишлаб чиқарилган энергияни ягона миллий энерготизимга узатиш учун 500 кВ кучланишли очиқ тақсимлаш қурилмалари ҳам барпо этилди.
