Тошкент автобусларида чиптасиз юрганлар жаримага тортилмоқда
Бу бўйича рейдлар 14 мартда бошланган.
Тошкент шаҳри жамоат транспортини мониторинг ва назорат қилиш давлат муассасаси билан биргаликда автобусларда йўл ҳақини тўламасдан тушиб кетаётган йўловчиларни аниқлаш бўйича кучайтирилган рейдлар бошланди. Бу ҳақида Транспорт назорати инспекцияси ахборот хизмати маълум қилди.
Қайд этилишича, аксарият йўловчилар тўловларни ўз вақтида амалга ошириб, тизим қулайлигини эътироф этаётган бир паллада, айримлар йўл ҳақини ҳеч қандай сабабсиз тўламасдан автобусдан тушиб кетаётгани тез-тез учраб турибди.
“Тошшаҳартрансхизмат” компаниясининг аниқлик киритишича, чиптасиз юрганларни жаримага тортиш 14 март санасидан бошланган.
Уларга Маъмурий жавобгарлик тўғрисидаги кодекснинг 144-моддаси 5-бандига асосан йўловчининг шаҳар ичида ва шаҳар атрофига қатнайдиган автобусда чиптасиз юриши БҲМнинг ўндан бир қисми — 37 минг сўм миқдорида жарима солинади.
Тўлов бир марталик ҚР-чипталар ёрдамида амалга оширилганда, уни сафар давомида сақлаб қолиши ҳамда назоратчи ва инспекторларининг сўровига асосан уларга кўрсатишлари лозим. Ходимлар бундай текширувларни ҳар куни ўтказади.
