Тошкент Марказий Осиёдаги энг хавфсиз шаҳар деб топилди
Ўзбекистон пойтахти Остона ва Олмаотани ортда қолдириб, минтақада етакчи бўлди.
Тошкент шаҳри расман Марказий Осиёдаги энг хавфсиз шаҳар деб топилди. Numbeo глобал порталининг 2025 йил якунлари бўйича тузилган хавфсизлик рейтингига кўра, Тошкент минтақадаги барча йирик шаҳарлардан юқори натижа қайд этиб, дунё миқёсида 51-ўринни эгаллади.
Рейтинг натижаларига кўра, Тошкент Марказий Осиёда хавфсизлик кўрсаткичлари бўйича Остона (81-ўрин) ва Олмаота (195-ўрин) шаҳарларини ортда қолдирди. Шунингдек, Ўзбекистон пойтахти МДҲ давлатлари орасида ҳам етакчи бўлиб, глобал рейтингнинг илк 100 талигига кирган тўққизта МДҲ шаҳарлари ичида биринчи ўринни эгаллади.
Мазкур рўйхатда Россиянинг Нижний Новгород (56-ўрин), Қозон (72-ўрин), Калининград (78-ўрин) ва Москва (99-ўрин) шаҳарлари ҳам юқори кўрсаткичлар билан қайд этилган.
Глобал миқёсда эса Яқин Шарқ шаҳарлари етакчиликни сақлаб қолди. Рейтингнинг кучли учлигидан Абу-Даби (БАА), Доҳа (Қатар) ва Дубай (БАА) жой олди. Шунингдек, Тайпей, Шаржа, Манама, Маскат, Гаага, Мюнхен ва Трондхайм шаҳарлари ҳам энг хавфсиз ўнталикдан ўрин эгаллади.
Numbeo мутахассисларининг таъкидлашича, хавфсизлик индекси жиноятчилик статистикаси билан чекланиб қолмай, ҳуқуқни муҳофаза қилиш органлари самарадорлиги, жамоат хавфсизлиги даражаси, шаҳар инфратузилмаси ҳолати ҳамда аҳоли ва сайёҳларнинг хавфсизликни субъектив баҳолаш кўрсаткичлари асосида шакллантирилади. Ушбу омиллар шаҳардаги умумий ҳаёт сифати ҳақида кенг қамровли ва нисбатан объектив тасаввур беради.
