Тошкент меторосида йўловчи қайтим йўқлиги сабаб кассадан қайтарилди
Ҳолат бўйича метрополитен узр сўраб чиқди.
Ижтимоий тармоқда йўловчилардан бири шошилиб “Туркистон” метро бекатига тушгани ва кассага эллик минг сўм пул бериб, чипта олмоқчи бўлганида оператор қайтим йўқлиги сабаб уни ортга қайтаргани ҳақида хабар тарқалди. Мазкур ҳолатга Тошкент метрополитени муносабат билдирди.
Маълум қилинишича, Тошкент метрополитенидаги касса операторлари навбатчилик асосида фаолият юритишади. Ҳолат юз берган вақтда оператор кундузги навбатчиликни қабул қилаётган бўлиб, навбатчилик алмашилганидан сўнг доимий равишда кассадаги мавжуд пуллар метрополитен йўриқномасига асосан олиб кетилади. Кунлик пул айланмасидан келиб чиқилиб қайтим учун кассада юз минг сўм нақд пул фонди қолдирилади.
Хусусан, келган илк йўловчиларнинг бири юз минг сўм, яна бири эса эллик минг сўм купюра бериб, чипта ҳарид қилгани учун кассада қайтим учун етарли маблағ қолмаган. Шунингдек, жами 3,5 дақиқа вақт ичида катта оператор бекатнинг иккинчи вестибюлидан қайтим учун пул олиб келган.
“Келтирилган ноқулайлик учун йўловчилардан узр сўраймиз”,— дейилади хабарда.
