Ўзбекистон ва Қозоғистон икки давлат чегараси демаркацияси бўйича шартнома лойиҳаси матнини маъқуллади. Бу ҳақда Қозоғистон ташқи ишлар вазирлиги маълум қилди.
“2022 йилнинг 25 июлидан 5 августига қадар Олма-Ота шаҳрида Қозоғистон ва Ўзбекистон Республикалари ҳукумат делегацияларининг навбатдаги йиғилиши бўлиб ўтди. Музокаралар давомида томонлар Қозоғистон Республикаси ва Ўзбекистон Республикаси ўртасидаги давлат чегараси демаркацияси тўғрисидаги шартнома матнини ҳамда чегара демаркацияси якуний ҳужжатлари лойиҳаси пакетини ишлаб чиқиш юзасидан келишувга эришди”, – дейилади вазирлик хабарида.
Ушбу масала юзасидан навбатдаги учрашув Тошкентда бўлиб ўтиши белгиланган. Унинг муддати дипломатик каналлар орқали аниқлаштирилади.
Аввалроқ Бугундан бошлаб Қозоғистон Ўзбекистон билан чегара пунктларини очгани тўғрисида хабар берилганди.