Тошкент вилоятида 30 метр баландликдаги бош Янги йил арчасининг чироқлари ёқилди. Маросимда 28 мингдан ортиқ ёруғлик ва безак элементлари билан безатилган арча томошабинларга байрамона кайфият улашди. Тошкент вилояти ҳокими Зоир Мирзаев тадбирда иштирок этиб, байрамнинг расмий очилиш маросимини олиб борди.
Тадбирда 100 нафар Қорбобо ва Қорқиз ҳам қатнашиб, болажонлар ва оилаларга қувонч улашди. Томошабинлар арча ёнида суратга тушиш ва байрамона дастурларни томоша қилиш имкониятига эга бўлди.
Ҳокимлик маълумотларига кўра, "Nurafshon Business City" ҳудудидаги бош арча майдонида Янги йил тадбирлари ҳар куни соат 10:00 дан 22:00 гача давом этади. Байрам давомида меҳмонлар учун турли кўнгилочар дастурлар, мусиқий чиқишлар ва болалар учун ўйинлар ташкил қилинади.