Тошкент шаҳарнинг Мирзо Улуғбек туманида содир бўлган йўл-транспорт ҳодисаси оқибатида “Nexia-3” автомобили “Matiz” билан тўқнашиб, сўнг кафега кириб кетди. Бу ҳақда пойтахт Йўл ҳаракати хавфсизлиги бошқармаси хабар берди.
Ҳодиса 21 октябрь куни соат 15:30 ларда Феруза кўчасида рўй берган. Дастлабки маълумотларга кўра, воқеа вақтда автомобилни вояга етмаган бола бошқарган.
Ҳодиса оқибатида ҳеч ким тан жароҳати олмаган. Шунга қарамай, автомобилларга ҳамда кафе биносига моддий зарар етган.
Маълум бўлишича, бола машинани уйдан яширинча олиб чиққан. Унинг акаси ҳодисадан сўнг жамоатчиликдан узр сўраб, воқеадан чуқур пушаймонлигини билдирган.
Мазкур ҳолат юзасидан Тошкент шаҳар ИИББ Йўл ҳаракати хавфсизлиги бошқармаси томонидан суриштирув ишлари бошланган. Ҳодисанинг барча тафсилотлари ўрганилмоқда.