Тошкентда йигит 10 млн қарзи сабаб банкоматни ўмармоқчи бўлди
Ҳодиса вақтида банкомат ичида 552 миллион сўмдан ортиқ маблағ бўлган.
Тошкент шаҳрида банкоматни бузиб очишга уринган шахс қўлга олинди. Бу ҳақда пойтахт Ички ишлар бош бошқармаси ахборот хизмати маълум қилди.
Қайд этилишича, воқеа Чилонзор туманида содир бўлган. Тахминан соат 02:30 атрофида ёш йигит банкомат жойлашган ҳудудга келиб, тош ёрдамида қурилманинг металл қопламасини уриб очишга ҳаракат қилган. Бир неча маротаба уринишига қарамай, у банкомат ичидаги сейфни оча олмаган ва фақат қурилмага шикаст етказган. Шундан сўнг, гумонланувчи воқеа жойидан яширинган.
Навбатчилик қисмига келиб тушган хабар асосида олиб борилган тезкор-қидирув тадбирлари натижасида ушбу шахс аниқланиб, қўлга олинди.
Гумонланувчи ўз кўрсатмасида 10 миллион сўм қарзи борлиги, ушбу маблағни бошқа шахсга ишониб топширгани ва қарзни ёпиш мақсадида жиноят содир этишга уринганини билдирган. У қилган ишидан пушаймон эканини таъкидлаган.
Маълум бўлишича, ҳодиса содир бўлган вақтда банкомат сейфи ичида 552 миллион сўмдан ортиқ пул маблағи бўлган. Қурилмага етказилган моддий зарар 30 миллион сўмни ташкил этган.
Мазкур ҳолат юзасидан Ўзбекистон Республикаси Жиноят кодексининг 169-моддаси 4-қисми «а» банди билан жиноят иши қўзғатилиб, гумонланувчига нисбатан қамоққа олиш тарзидаги эҳтиёт чораси қўлланилган. Тергов ҳаракатлари давом этмоқда.
