Махсус комиссия томонидан, Президентнинг экология масалалари бўйича маслаҳатчиси бошчилигида, Тошкент шаҳри, Сергели тумани ҳудудида жойлашган “Prosab” МЧЖ Қ/К, “Асл Ойна” МЧЖ, “Alutex” МЧЖ ҳамда Янгиҳаёт туманидаги “PROFPASK” МЧЖ фаолияти ўрганилди.
Маълумотларга кўра, “Prosab” МЧЖ турли диаметрдаги алюминий ва мис кабеллари, “Alutex” МЧЖ алюминий профиллар, “Асл Ойна” МЧЖ эса шиша буюмлар ишлаб чиқаради. Ушбу корхоналар атроф-муҳитга юқори хавфли таъсир кўрсатади ва атмосферага азот икки оксиди, углерод оксиди, алюминий ва мис оксидлари чиқаради. Шу билан бирга, “PROFPASK” МЧЖ гофрировка қилинган қоғоз ва картон ишлаб чиқаради ва паст даражада хавфли объект сифатида баҳоланади.
Ўзбекистон Республикаси Президентининг 2023 йил 31 майдаги ПФ-81-сон Фармонига мувофиқ, I ва II тоифали юқори хавфли корхоналарда “атмосфера ҳавосига устувор турғун ифлослантирувчи манбалардан чиқадиган ташланмаларни таҳлил қилувчи автоматик мониторинг станцияларини ўрнатиш” мажбурий ҳисобланади. Акс ҳолда компенсация тўловлари беш баравар оширилади.
Ўрганишлар давомида юқоридаги корхоналар томонидан автоматик мониторинг станциялари ўрнатилмаганлиги аниқланиб, уларга ёзма мажбурий кўрсатмалар берилди. Шу билан бирга, мониторинг станциясини ўрнатмаган тақдирда компенсация тўловлари беш баравар оширилиши бўйича огоҳлантириш берилди.
Шунингдек, Президентнинг 2025 йил 30 январдаги 16-сон Фармонига мувофиқ, атмосфера ҳавоси ифлосланишини назорат қилувчи мониторинг станцияларини ўрнатган корхоналарга компенсация тўловларининг бир қисми икки йил давомида қайтарилиши, келгуси бир йил ичида чанг-газ ва сув тозалаш ускуналари ўрнатилганда эса компенсация тўловларининг 70 фоизигача бўлган қисми икки йил давомида қайтарилиши тартиби жорий этилган.