ТoшВЗИТИ делегациясининг Жанубий Кореядаги илмий-ҳамкорлик сафари якунланди
Сафар давомида етакчи университет ва илмий марказлар билан қўшма тадқиқотлар бўйича келишувларга эришилди.
Тошкент вакцина ва зардоблар илмий-тадқиқот институти (ТoшВЗИТИ) делегациясининг Жанубий Кореяга амалга оширган илмий-ҳамкорлик сафари доирасида қатор нуфузли университетлар ҳамда илмий-тадқиқот марказлари билан учрашувлар ўтказилди. Музокаралар натижасида биотехнология, фармацевтика ва вакцина ишлаб чиқариш соҳаларида ҳамкорликни кенгайтириш бўйича муҳим келишувларга эришилди.
Сафар чоғида Yonsei университетининг Механик инженерия факультетига ташриф буюрилиб, механик ва биотиббиёт муҳандислиги йўналишларида қўшма илмий тадқиқотларни йўлга қўйиш, микроигналар орқали вакцина етказиб бериш технологиясини ишлаб чиқиш ва уни ТoшВЗИТИ амалиётига жорий этиш масалалари муҳокама қилинди. Шунингдек, K-NBIRT илмий-тадқиқот маркази билан биотехнология ва вакцина ишлаб чиқариш, кадрлар малакасини ошириш ҳамда ўқув-тренинг дастурларини ташкил этиш бўйича аниқ режалар белгилаб олинди.
Chungbuk миллий университети ва Ханянг университети билан ўтказилган учрашувлар якунларига кўра фармацевтика, микробиология ва биотехнология соҳаларида қўшма тадқиқотлар, мутахассислар ва ёш олимлар алмашинуви, илмий семинар ва тренинглар ўтказиш бўйича ҳамкорлик меморандумлари имзоланди. Ушбу сафар ТoшВЗИТИнинг Жанубий Кореянинг етакчи илмий марказлари билан стратегик ҳамкорлигини мустаҳкамлаб, замонавий технологияларни жорий этиш ва илмий салоҳиятни янги босқичга олиб чиқишга хизмат қилиши қайд этилди.
