Трамп Нетаняхуни “негативчи” деб атади

АҚШ президенти Доналд Трамп Исроил бош вазири Бенямин Нетаняхуга Ғазо бўйича тинчлик режаси муҳокамаси чоғида қўпол ибора билан мурожаат қилган. Бу ҳақида Ахиос нашри АҚШ ҳукуматидаги манбага таянган ҳолда хабар берди.

 

Маълумотларга кўра, 3 октябрь куни Ҳамас вакиллари Трампнинг тинчлик режаси бўйича таклифини шартли равишда ижобий қабул қилганида, Трамп буни муҳим ютуқ сифатида кўриб, Нетаняхуга қўнғироқ қилган. Аммо Исроил бош вазири бу жавобни совуққонлик билан қабул қилиб, байрам қилишга ҳали эрта эканини айтган.

 

Нетаняхунинг бу оҳанги Трампни ғазаблантирган ва у Нетаняхуга: “Сен доимо жуда салбийсан. Бу ғалаба, уни қабул қил”, деган. Манбалар аслида Трамп янада қўполроқ сўз ишлатганини қайд этмоқда.

 

Мутахассислар фикрича, бу тортишув Трампнинг Ғазо бўйича тинчлик режаси унга қанчалик муҳим эканини ва уни ўзининг дипломатик ютуғи сифатида кўришга интилаётганини кўрсатади.

 

Трампнинг режаси 29 сентябрь куни, у ва Нетаняху Вашингтонда учрашганидан сўнг эълон қилинган эди. 20 банддан иборат ҳужжатда барча исроиллик гаровдагиларни озод қилиш, Ҳамаснинг таслим бўлиши, Ғазога инсонпарварлик ёрдамини етказишга рухсат бериш ҳамда ҳудудни вақтинча халқаро органлар назоратидаги маъмуриятга топшириш кўзда тутилган.

 

Аммо Нетаняху хавфсизлик кафолатлари ва демилитаризация масалаларида қўшимча шартларни илгари сургани сабабли томонлар ўртасида кескинлик юзага келгани қайд этилмоқда.