АҚШ президенти Доналд Трамп Уолтер Рид миллий ҳарбий тиббиёт марказида навбатдаги тиббий кўрикдан ўтди. Шифокорларнинг маълум қилишича, давлат раҳбарининг умумий соғлиги “аъло даражада”, юрак фаолияти эса ўз ёшига нисбатан “тахминан 14 ёшга ёшроқ” ҳолатда экан.
Трамп Бетесда шаҳридаги касалхонада ўтказилган уч соатлик текширув давомида йиллик профилактик тиббий кўрикдан ўтган, грипп ва COVID-19 га қарши эмлашларни ҳам олган. Унинг шифокори, АҚШ денгиз флоти капитани Шон Барбабелланинг қайд этишича, таҳлиллар президентнинг юрак-қон томир, ўпка, асаб тизими ва жисмоний тайёргарлиги юқори даражада эканини кўрсатган.
Тиббий текширув кенг қамровли лаборатория таҳлиллари, замонавий диагностика усуллари ҳамда профилактик баҳолаш жараёнларини ўз ичига олган. Барбабелла текширув Трампнинг яқинлашаётган халқаро сафарлари олдидан соғлигини назорат қилиш мақсадида ўтказилганини маълум қилди.
Аввалроқ, Трамп соғлиги билан боғлиқ турли миш-мишларни рад этиб, ўзининг жисмоний ҳолати “яхши ва барқарор” эканини таъкидлаган эди. Шунингдек, шифокорлар илгари унда сурункали веноз етишмовчилик аниқланганини билдирган бўлсалар-да, бу ҳолат президент фаолиятига таъсир қилмаётгани қайд этилган.