ЮНЕСКО сессияси доирасида Ўзбекистон ва Словакия Президентлари учрашди

Самарқанд шаҳрида бўлиб ўтаётган ЮНЕСКО Бош конференцияси 43-сессияси доирасида Ўзбекистон Республикаси Президенти Шавкат Мирзиёев ва Словакия Республикаси Президенти Петер Пелегрини ўртасида ики томонлама учрашув бўлиб ўтди. Учрашувда Ўзбекистон билан Словакия ўртасидаги стратегик шериклик ва кўп қиррали ҳамкорлик муносабатларини янада кенгайтиришнинг долзарб жиҳатлари кўриб чиқилди.

 

Ики давлат ўртасидаги барча даражадаги алмашинувлар ижобий суръатда давом этаётани, устувор йўналишларда ҳамкорлик мустаҳкамланиб бораётани қайд этилди. Жорий йилда сиёсий маслаҳатлашувлар ва Ҳукуматлараро комиссиянинг биринчи йиғилиши муваффақиятли ўтказилгани, ишбилармонлик алоқаларининг фаоллашгани ва қўшма корхоналар сонининг уч баравар кўпайгани таъкидланди.

 

Товар айирбошлаш ва инвестициялар ҳажмини ошириш, шунингдек, муҳим тармокларда саноат кооперацияси лойиҳаларини кенгайтириш масалалари муҳокама қилинди. Ўзбекистондан тўқимачилик, чарм, мева-сабзавот маҳсулотлари, Словакиядан каучук, автомобиллар учун бутловчи қисмлар, фармацевтика ва бошқа саноат товарлари етказиб беришни кўпайтиришга келишиб олинди. Шу мақсада миллий маҳсулотлар кўргазмаларини ўтказиш, савдо уйларини очиш режалаштирилган.

 

Рақамлаштиришни ривожлантиришга алоҳида эътибор қаратилиб, банкларнинг киберхавфсизлик мониторингини юритиш ва юк ташишларни кузатишнинг илғор тизимларини жорий этиш бўйича қўшма марказ ташкил этиш масаласи таклиф қилинди. Словакия бизнеси билан автомобил бутловчи қисмлар, тайёр сут маҳсулотлари ишлаб чиқариш ва бошқа йўналишларда ҳамкорликни янада кенгайтиришга тайёрлик билдирилди.

 

Гуманитар ва таълим алмашинувларини фаоллаштириш истиқболлари кўриб чиқилиб, 2026 йилда Братислава шаҳрида ики мамлакат ректорларининг биринчи форумини ўтказиш, туризм кўргазмалари ва ўзаро Туризм кунларини ташкил этиш таклиф қилинди. Тартибли меҳнат миграциясини йўлга қўйиш масаласига ҳам тўхталиб ўтилди.