13 декабрь куни соат 01:30 ларда Яшнобод туманидаги “Авиасозлар” деҳқон бозорида йирик ёнғин келиб чиқди. Ёнғин қарийб 2 соат давом этган. Оқибатда озиқ-овқат, кийим-кечак ва бошқа турдаги маҳсулотлар ёниб кетган. Тошкент шаҳар ФВББ эса ўз хабарида бозор ҳудудидаги маъмурий бино ёнаётганини ёзган, аниқ маълумотларни келтирмаган. Zamon.uz мухбири талафот тафсилотларини ўрганиш учун манзилга борди.
Савдогарларнинг сўзларига кўра, бозорнинг 2 қаватли мажмуасида асосан сут-қатиқ, озиқ-овқат, парфюмерия маҳсулотлари сотилган. Юқори қаватда 30 дан ортиқ тадбиркорлар бўлган.
“Энди токдан чиққан деб ўйлаймиз. Ҳамма айтяпти. Тепанинг (2-қават) ҳаммаси ёниб кетган, қанча одамнинг товарлари бор эди. Шунча ‘расход’. Иккинчи қаватдан чиққан-да ҳаммаси, пастлар ҳам ёниб кетибди-ку, холодильниклар, ҳамма нарса”, — дейди савдогарлардан бири.
Унинг қўшимча қилишича, бир нечта тадбиркорлар 12-декабрь куни ўз расталарига товар олиб келган.
“Ўғлимнинг магазини бор, склади ҳам бор. Менинг ёнимда яна битта магазин, ўзимнинг складим ҳам бор. Ҳаммаси кул бўлиб ёниб кетган. Янги йилга фирмалардан роса мол олгандик. Агар ўшани тўлаб бермаса, президентгача чиқаман.
Складда хўжалик товари бўлган. Бизда парашок, памперс, ҳамма нарса бўлган. Ўғлимникида озиқ-овқат. Менинг ўзимда 65 минг долларлик молим бор эди. Агар ундан кўп бўлмаса.
Янги йил олдидан байрам деб бизга фирмалардан роса скидка қилиб беришган. 20 дан 25 декабргача ишламаймиз деб бизга кўп мол олдирган. Складда оёқ қўйишга жой йўқ эди. Тўла эди. Памперс, парашок, дезодорантларни роса олгувдим. Чунки биз ‘подарочный набор’ қилардик”, — дейди савдогар аёл.
Суҳбат давомида бошқа бир тадбиркор 600 миллион сўмга яқин товари ёниб кетганини айтди.
“Мен 02:00 ларда келган эдим, 50 фоизини ўчириб бўлишган эди. Келганда ҳеч кимни киргизишмаётган эди. Ҳозир ҳам киргизишмаяпти. Қанча талафот бўлганини билолмаяпмиз-да. Лекин 2-қават бутунлай ёниб бўлган. 1-қават номаълум, у ерда ҳам омборхоналаримиз бор эди. Уларга тепа қаватдан сув оқиб ётган эди, зарарни ким қоплайди бундай вазиятда, кимга мурожаат қилишимиз керак? Ўшаларни билмаяпмиз”, — дейди тадбиркор.
У сўзи давомида 2-гуруҳ ногирони эканини, 15 000 АҚШ доллари қарзи борлигини билдирди.
“Компенсацияни номаълум дейишяпти, лекин тушунтириш хати ёзиб бердик, қанча миқдорда молимиз борлигини ёздик. Шу ерда 100 га яқин одам оиласини боқади-да. Энди ҳозир бизда бошқа пул келадиган жой йўқ. Дўконни аёлимнинг номига очиб, юргизиб юргандим”, — дейди суҳбатдошимиз.
Биз ёнғин кўлами ва қанча тадбиркор жабрланганини билиш учун бозор маъмурияти вакилига микрофон тутдик. У ичида экспертиза ишлари кетаётганини, маълумот йўқлигини билдирди.
“Аниқлик киритиш керак, ҳозир бизни ҳам қўйишмаяпти”, — дейди у.
Эслатиб ўтамиз, 11-август куни Тошкент туманидаги “Уч қаҳрамон” бозорида ҳам йирик ёнғин юз берганди. Ўшанда талафот оқибатида етказилган зарар 6 миллион долларга баҳоланган эди.