Йирик тамаки компанияси АҚШга 635 миллион доллар товон пули тўлайди
АҚШ Бош прокурори ўринбосари бу тўлов Адлия вазирлиги тарихидаги Шимолий Кореяга қарши санкцияларни бузганлик учун энг катта жарима бўлишини айтди.
British American Tobacco тамаки компанияси Шимолий Кореяга санкцияларни бузган ҳолда тамаки ва сигареталар сотгани учун АҚШ ҳукуматига 635 миллион доллар тўлайди.
БAT 25 апрель куни АҚШ Адлия ва Молия вазирлиги билан тўлов бўйича келишув имзолади. Компания раҳбари Жек Боулз БАТ қоидабузарлигидан чуқур афсусда эканини айтди.
БАТнинг Сингапурдаги шўъба корхонаси 2007-2017 йилларда Шимолий Кореяга сигарет етказиб берганини тан олган. Бунга қарши Қўшма Штатлар ядровий қурол ва баллистик ракеталарни ишлаб чиқиш учун қаттиқ санкциялар киритганди.
British American Tobacco дунёдаги энг йирик тамаки компанияларидан биридир. У U Lucky Strike, Dunhill ва Pall Mall каби сигарет брендларига эга.
АҚШ Бош прокурори ўринбосари Метю Олсен сешанба куни бўлиб ўтган брифингда БАТ бўйича келишув узоқ давом этган тергов натижаси бўлганини ва бу тўлов Адлия вазирлиги тарихидаги Шимолий Кореяга қарши санкцияларни бузганлик учун энг катта жарима бўлишини айтди.
"БАТ санкцияларни четлаб ўтиш ва Шимолий Кореяга тамаки ҳамда тамаки маҳсулотларини сотиш учун мураккаб шўъба корхоналари занжирини яратди", — деди Олсен.
Ушбу бизнесда ушбу фирмалар 2007-2017 йилларда, Адлия вазирлиги ҳисоб-китобларига кўра, тахминан 428 миллион доллар даромад олган.
БАТдан ташқари, АҚШ расмийлари Шимолий Корея банки ходими Сим Хён Сеоп, америкаликлар ушбу ишда иштирок этганликларини айтаётган хитойлик Чин Гуомин ва Хан Линлинга нисбатан зимдан жиноий иш қўзғатган.
Қўшма Штатлар кореяликни қўлга олишда ёрдам берганлар учун беш миллион, иккала хитойлик учун ярим миллион доллар мукофот пули эълон қилди.
Улар Шимолий Корея давлат тамаки заводлари учун баргли тамаки сотиб олганликда ва АҚШ банклари орқали 74 миллион долларлик тўловларни амалга ошириш мақсадида қалбаки ҳужжатлар юритганликда айбланмоқда. АҚШ маълумотларига кўра, шимолий кореяликлар ушбу битимлардан 700 миллион долларгача даромад олишган.
Шимолий Корея етакчиси Ким Чен Иннинг тамакига ружу қўйганини унинг кўпинча расмий суратлар ва телекамералар қаршисида сигарет билан кўриниш берганидан билиш мумкин.
Ўтган йили Қўшма Штатлар БМТ Хавфсизлик Кенгаши орқали Шимолий Кореяга тамаки экспортини умумий тақиқлашни таклиф қилган, бироқ бу ташаббус Хитой ва Россия томонидан рад этилган эди.
