ЙТҲда вафот этган 3 нафар банк ходими дам олиш куни ишга жалб қилингани айтилмоқда
Навоий вилояти Бандлик бош бошқармаси Давлат меҳнат инспекцияси томонидан ўрганиш ишлари бошланди.
6 ноябрь куни Навоийда автоҳалокат оқибатида 8 киши ҳалок бўлгани, уларнинг 3 нафари Халқ банкининг Нурота филиали ходимлари экани айтилаётгани ҳақида хабар берилганди.
Амалиётчи юрист Саидали Мухторалиевнинг ёзишича:
"Марҳумлар юқори турувчи раҳбарлар берган топшириқларни бажариш учун дам олиш кунида ишга чиқишга мажбур бўлган деган маълумот келмоқда".
Инсайдерларга кўра, шанба куни эрталабдан вилоят филиалидаги норасмий йиғилишга чақирилган. Лекин, ўртада бирор-бир расмий хат ёки дам олиш куни ишга чиқиш ва меҳнат мажбуриятлари билан шуғулланиш ҳақида буйруқ ёки қарор бўлмаган".
"Халқ банки" матбуот хизматининг ҳолат юзасидан билдирган муносабатида марҳумларнинг оила аъзолари ва яқинларига ҳамдардлик билдирилган, аммо қўшимча тафсилотлар, яъни нега айнан дам олиш куни ходимлари билан бундай ҳолат юзага келгани ҳақида ҳозирча изоҳ келтирмаган.
Бандлик ва меҳнат муносабатлари вазирлигининг маълум қилишича, ушбу ҳолат юзасидан Навоий вилояти Бандлик бош бошқармаси Давлат меҳнат инспекцияси томонидан ўрганиш ишлари бошланди. Ўрганиш натижалари бўйича қўшимча маълумот тақдим этилади.
Эслатиб ўтамиз, 8 кишининг ҳалок бўлишига олиб келган ушбу ЙТҲ қарама-қарши йўналишда ҳаракатланиб келаётган иккита Nexia тўқнашуви оқибатида юз берган. Машиналарнинг бири йўл четига ағдарилган, иккинчиси эса ёниб кетган.
Автоҳалокат оқибатида "Халқ банки" Нурота туман филиалининг бошқарувчиси Т.П. (29 ёш), бош ҳисобчиси М.С. (40 ёш) ҳамда мониторинг бўлими бошлиғи Ю.Р. (32 ёш) воқеа жойида вафот этган. Ёниб кетган машинада 5 киши бўлган ва улар ҳам воқеа жойида ҳалок бўлган.
Баҳринисо Мадумарова
