Jahon chempionatida hamyurtimiz kumush medalga sazovor bo‘ldi
Rossiyaning Ufa shahri erkin, yunon-rum va ayollar kurashi bo‘yicha yoshlar o‘rtasida Jahon chempionatiga mezbonlik qilmoqda.
Bugun ushbu musobaqa yakuniga yetadi. Musobaqada Vatanimiz sharafini -55 kg vazn toifasida himoya qilgan yunon-rum kurashchimiz Alimardon Abdullayev finalga qadar mag‘lubiyatsiz yetib bordi. U nimchorak finalda qirg‘izistonlik Akyikat Kuljigitni 5-1, chorak finalda ruminiyalik Denis Florinni 8-0, yarim finalda esa tojikistonlik Aslamjon Azizovni 8-3 hisobida mag‘lub etdi.
Oltin medal uchun eronlik Amirrizo Dehbozorgi bilan kechgan bahsda Alimardon 1-3 hisobida imkoniyatni boy berdi va yakunda kumush medal bilan taqdirlandi.
-87 kg vazn toifasida Jahon chempionatining bronza medali uchun kechgan o‘tish bahslarida yana bir kurashchimiz Shahriyor Jo‘raboyev avvaliga xorvatiyalik Kristian Lukachdan ustun keldi. Biroq, bronza medali uchun kechgan bellashuvda turkiyalik Tansel Ortuchuga 3-5 hisobida imkoniyatni boy berdi va musobaqani 5-o‘rinda yakunladi.
Avvalroq kurashchimiz Alimardon Abdullayevning jahon chempionati finalida ishtirok etishi haqida xabar bergan edik.
