«ArMI — 2021»: o‘zbek harbiylari uchinchi marta g‘olib bo‘ldi
Markaziy harbiy okrugning “Forish” tog‘ poligonida «Xalqaro armiya o‘yinlari» doirasida «Harbiy-tibbiy estafeta» musobaqasining so‘nggi sharti — «Jamoaviy birinchilik» bellashuvi bo‘lib o‘tdi.
«Jamoaviy birinchilik» shartiga ko‘ra, ishtirokchilar muhandislik to‘siqlaridan emaklab o‘tib, shartli yaradorga birinchi tibbiy yordam ko‘rsatish, uni tibbiy zambil va arqon yordamida suvli to‘siq ustidan olib o‘tish, sanitar harbiy texnikaga joylashtirish, barcha aslahalarni yig‘ishtirib, xavfsiz hududga olib chiqish kabi mashqlarni bajardi.
Ishtirokchilar shartli ravishda jang maydoniga aylantirilgan maxsus yo‘laklarda o‘z mahoratini namoyish qildi.
Yakuniy natijalarga ko‘ra, erkaklar va ayollar bahsida O‘zbekiston jamoasi birinchi o‘ringa egalladi.
O‘zbekiston Mudofaa vazirligi jamoasi bu yil ham musobaqaning «Jamoaviy birinchilik» bosqichida yangi rekord qayd etdi. Mazkur shartni erkaklar 5 daqiqa 28,4 soniya (o‘tgan yil – 6‘28,8), ayollar esa 7 daqiqa 51,3 soniya (o‘tgan yil – 10‘09,2) ichida bajarishga muvaffaq bo‘ldi.
Barcha shartlardagi umumiy natijaga ko‘ra, birinchi o‘rinni O‘zbekiston Mudofaa vazirligi jamoasi, ikkinchi o‘rinni Rossiya Federatsiyasi, uchinchi o‘rinni esa Xitoy Xalq Respublikasi jamoasi egalladi.
Eslatib o‘tamiz, mazkur musobaqada hamyurtlarimiz 3 yildan buyon g‘oliblikni qo‘ldan bermay kelyapti.
Maqsadjon Obidjonov
