Messining debyut o‘yini tomoshasi Ispaniyada rekord natijani qayd etdi
Lionel Messining «Paris Saint-Germain» safidagi debyut o‘yinini Ispaniyada 2 milliondan ortiq muxlis tomosha qildi. Shu tariqa “PSJ” va “Reyms” o‘rtasidagi «fransuzlar bahsi» Ispaniyada eng ko‘p tomosha qilingan o‘yin sifatida rekord o‘rnatdi.
34 yoshli argentinalik Neymar o‘rniga almashtirilib, 30 daqiqa o‘ynagan uchrashuvda “PSJ” 2-0 hisobida “Reyms” ustidan g‘alabaga qozondi. Jamoaning ikkala goliga ham “Real” nishonida turgan Kilian Mbappe mualliflik qildi.
Messining debyuti Ispaniyaning “Telecinco” bepul kanali orqali efirga uzatildi. 2,2 million tomoshabinga ega bo‘lgan ushbu uchrashuv yakshanba kuni mamlakat bo‘ylab eng ko‘p ko‘rilgan ko‘rsatuvga aylangan. Dunyo miqyosida oladigan bo‘lsak, “PSJ”ning o‘sha g‘alabasini 6,7 milliondan ziyod odam tomosha qilgan. Taqqoslash uchun: “Barselona” “Xetafe” ustidan 2-1 hisobida g‘alaba qozongan o‘yinni televideniye orqali 591 ming muxlis ko‘rgan.
Maʼlumot uchun, Lionel Messi “PSJ” safiga o‘tganidan so‘ng uning sobiq jamoadoshi Jerard Pike Ispaniya bo‘ylab Fransiya chempionati translyatsiya huquqini sotib olganini aytgan edi.
Eslatib o‘tamiz, bundan avval “Real” bu yozni Mbappesiz o‘tkazishi haqia xabar bergan edik.
Maqsadjon Obidjonov
