Tokio-2020 Paralimpiya oʻyinlaridan navbatdagi oltin medal
Safiya Burxanova Tokio 2020 Paralimpiya o‘yinlari, para-yengil atletikaning F12 klassida ayollar oʻrtasida yadro uloqtirish boʻyicha oltin medal sovrindori.
Tokio-2020 Paralimpiya oʻyinlaridan kelayotgan xushxabarlar davom etadi. Hozirgina para-yengil atletikaning F12 klassida ayollar oʻrtasida yadro uloqtirish boʻyicha final bahslari yakunlandi.
Unda ishtirok etgan hamyurtimiz Safiya Burxanova 14.78 metr natija bilan oltin medalni qoʻlga kiritdi. Taʼkidlash kerakki, bu mavsumdagi eng yaxshi natija sifatida ham qayd etildi. Ikkinchi oʻrin italiyalik Assunta Legnatega (14.62) nasib etgan boʻlsa, meksikalik Rebeka Alvares (13.72) kuchli uchlikka yakun yasab berdi.
Eslatib oʻtamiz, Safiya Burxanova Rio-2016 yozgi Paralimpiya oʻyinlarida kumush medalini qoʻlga kiritgan edi. Shu tariqa delegatsiyamiz hisobidagi medallar soni 17 taga yetdi: 7 ta oltin, 4 ta kumush va 6 ta bronza.
