Iker Kasilyas Dubayda darvozabonlar tayyorlash markazini ochmoqchi
“Real” va Ispaniya terma jamoalari sobiq darvozaboni Iker Kasilyas o‘zining birinchi darvozabonlarni tayyorlash markazini ishga tushirmoqchi.
U «Iker Kasilyas» darvozabonlarni tayyorlash markazi deb nomlanadi. Mazkur markaz Birlashgan Arab Amirliklarining Dubay shahrida quriladi. Loyiha Amirlik Sport kengashi tomonidan maʼqullangan.
«Sport — mening hayotim. U menga o‘zim istagan barcha narsani berdi. Shuning uchun iqtidorli darvozabonlar tayyorlaydigan markazni ishga tushirmoqchiman. Markaz nafaqat darvozabon, balki yosh futbolchilar qobiliyatini ham rivojlantirishga xizmat qiladi.», — dedi futbolchi.
Markazda boshqa davlatlardan kelgan bolalar ham tarbiyalanadi. Shuningdek, bu yerda darvozabonlar uchun murabbiylar tayyorlash rejalashtirilgan.
Kasilyas loyihasi “Real Madrid"ning sobiq himoyachisi Mishel Salgado asos solgan «Fursan Hispania» futbol maktabi bilan hamkorlikda ishlaydi.
