“Odamlar hurmat qilishlari uchun, bilmadim, yana nima qilishim kerak” — Neymar
“PSJ” klubi hamda Braziliya terma jamoasi hujumchisi Neymar muxlislarga murojaat bilan chiqdi.
Chunki JCH-2022 bahslarida “Pentacampionlar” Peru ustidan 2:0 hisobida g‘alaba qozonganiga qarmay, muxlislar undan norozi ekanini bildirgan. Holbuki Neymar ushbu o‘yinda bitta gol urgan, bitta golga hammualliflik qilgan.
“Terma jamoa manfaati, albatta, hamma narsadan ustun. Men saralash bahslarida ko‘p gol kiritganim, g‘alabalarga o‘z hissamni qo‘shganimdan xursandman. Hammasi yaxshi davom etsa, tez orada Pele rekordini yangilab, jamoaning eng yaxshi to‘purariga aylanaman. Bu men uchun sharaf. Lekin meni mutlaqo boshqa narsa ajablantiradi.
Muxbir, futbol sharhlovchilari va muxlislar men haqimda anchadan buyon salbiy fikrlar bildirayotganidan xabarim bor. Bu balki normal holatdir, lekin baʼzida ana shunday bosimlar tufayli intervyu berishni ham xohlamay qolaman. Odamlar hurmat qilishlari uchun, bilmadim, yana nima qilishim kerak”, deydi o‘z murojaatida Neymar.
Maʼlumot uchun: 29 yoshli braziliyalik JCH-2022 saralash bahslarida 20 ta o‘yinda ishtirok etib, 12 ta gol urdi. Bu natija jamoa doirasida rekord hisoblanadi.
Eslatib o‘tamiz, bundan avvalroq Xaviyer Tebasning Messi haqidagi fikrlarini taqdim etgan edik.
Maqsadjon Obidjonov
