Panjsher qarshilik kuchlari AQSHga taʼsir o‘tkazmoqchi
Ahmad Masʼud AQSHdan yordam olish maqsadida yuqori mavqeli lobbist yolladi. Bu haqda The New York Times xabar berdi.
Milliy qarshilik fronti yetakchisi Ahmad Masʼud Vashingtonda katta mavqega ega Robert Strik bilan shartnoma imzolagan. Siyosatchi shu yo‘l bilan AQSH qo‘llab-quvatlashiga erishmoqchi.
Shartnoma 15 sentyabr tunda AQSH adliya vazirligiga kelib tushgan. Unda ko‘rsatilgan xizmatlar beg‘araz amalga oshirilishi lozim. The New York Times‘ning taʼkidlashicha, bu toliblarga qarshi muxolifat kuchlarning umumiy manfaatlarini ifodalaydigan qadam bo‘ldi. Shuningdek, nashr maʼlumotlariga ko‘ra, avvalroq amerikalik lobbistlar xizmatiga “Tolibon” ham murojaat qilgan.
Ahmad Masʼudning AQSHdagi vakili Ali Maysam Nazariy bu qadam “Tolibon”ning qonuniy harakat sifatida tan olinishiga qarshi turishga qaratilganini bildirgan. “Afg‘onistonda hech qaysi harakat Ahmad Masʼud zoti oliylari qo‘llab-quvvatlovi yoki roziligisiz qonuniy maqomga ega bo‘lishi mumkin emas. Chunki hozirda aynan Masʼud qonuniylik manbai hisoblanadi”, - degan Nazariy.
Lobbizm — siyosiy-huquqiy jarayonlarda norasmiy shaxslarning rasmiy qarorlarga taʼsir ko‘rsatish usuli. AQSHda lobbizm taraqqiy topgan bo‘lib, uning xizmatidan nafaqat alohida shaxslar, balki davlatlar ham foydalanadi. Lobbizmdan ko‘zlangan asosiy maqsad- shaxsiy manfaatlar uchun zarur qarorlar qabul qildirish hisoblanadi.
Maʼlumot o‘rnida: 15 avgust kuni “Tolibon” harakati Kobulni egallagan. 31 avgustda AQSH Afg‘onistonni to‘liq tark etdi. Harakat tomonidan egallanmagan yagona viloyat Panjsher viloyati edi. Ammo 6 sentyabrda ushbu hudud ham “Tolibon” nazoratiga o‘tdi. Shundan keyin toliblar 7 sentyabr kuni mamlakatning yangi hukumati tuzilganini eʼlon qildi.
Eslatib o‘tamiz, avvalroq “Tolibon” Panjsherga gumanitar yordam yuborgani maʼlum qilingan edi.
Jahongir Qo‘ziyev
