Prezident Shavkat Mirziyoyev Hindistonga ta’ziya yo‘lladi

O‘zbekiston Respublikasi Prezidenti Shavkat Mirziyoyev Uttar-Pradesh shtatida kuchli yog‘ingarchilik va bo‘ron oqibatida ko‘plab insonlar halok bo‘lgani va jiddiy jarohat olgani munosabati bilan Hindiston Respublikasi Prezidenti Draupadi Murmu va Bosh vaziri Narendra Modiga ta’ziya maktubi yo‘lladi. Bu haqda Prezident matbuot kotibi xabar berdi.

 

Davlat rahbari qurbon bo‘lganlarning oila a’zolari va yaqinlariga chuqur hamdardlik izhor etdi, jarohat olganlar tez fursatda sog‘ayib ketishini tiladi.

 

The Indian Express xabar qilishicha, Hindistonning Uttar-Pradesh shtatida kuchli shamol va jala bilan kuzatilgan bo‘ron oqibatida kamida 111 kishi halok bo‘lgan, 72 kishi jarohat olgan.

 

Ma’lumotlarga ko‘ra, tabiiy ofat shtatning 26 ta tumaniga zarar yetkazgan. Bo‘ron oqibatida 170 bosh chorva nobud bo‘lgan, 227 ta uy zarar ko‘rgan.

 

Eng ko‘p qurbon Prayagraj tumanida qayd etilgan bo‘lib, u yerda 21 kishi halok bo‘lgan. Mirzapurda 19, Bhadohida 16, Fatehpurda 11 kishi vafot etgan.

 

Rasmiylarning bildirishicha, o‘lim va jarohatlarning aksariyati daraxtlarning qulashi, devor va tomlarning bosib qolishi, shuningdek kuchli shamol uchirib ketgan buyumlar sabab yuz bergan.

 

Uttar-Pradesh bosh vaziri Yogi Adityanath barcha tuman ma’muriyatlariga zararlarni zudlik bilan baholash va jabrlangan oilalarga 24 soat ichida kompensatsiya yetkazishni topshirgan. Halok bo‘lganlarning yaqinlariga 400 ming rupiy miqdorida moliyaviy yordam berilishi belgilangan.

 

Shuningdek, hosil yo‘qotishlari, chorva nobud bo‘lishi va boshqa zararlar uchun ham kompensatsiya to‘lash jarayonini tezlashtirish bo‘yicha ko‘rsatma berilgan.

 

Favqulodda vaziyatlar bo‘yicha komissar idorasi vaziyatni tun-u kun nazorat qilmoqda. Hududiy ma’muriyatlar har uch soatda vaziyat bo‘yicha hisobot topshirishi kerak. Rasmiylar qurbonlar soni yana oshishi mumkinligini bildirmoqda.

 

Bhadohi tumanidagi Rampur hududida bo‘ron Ganga daryosi ustidagi ponton ko‘prikka zarar yetkazgan. Oqibatda bir necha kishi daryoga tushib ketgan, biroq ularning barchasi qutqarilgan.

 

Mirzapurdagi Gaura Pramanpur hududida ham ponton ko‘prik shikastlangan va 20 ta qishloq bilan aloqa uzilgan.

 

Fatehpur tumanida 11 kishi halok bo‘lgan, 16 kishi jarohatlangan. Pratapgarh hududida esa devor va sement tomlarning qulashi hamda chaqmoq urishi oqibatida to‘rt kishi vafot etgan.

 

Kanpur Dehat tumanida 19 yoshli qiz kuchli yomg‘ir vaqtida daraxt ostida turganida chaqmoq urishi oqibatida halok bo‘lgan.

 

Hindiston meteorologiya xizmati mutaxassisi Atul Kumar Singhning aytishicha, bunday bo‘ronlar mavsumiy holat hisoblanadi, biroq bu safargi shamol kuchi noodatiy darajada yuqori bo‘lgan.

 

Meteorologlar ayrim hududlarda shamol tezligi soatiga 100 kilometrdan oshganini, ko‘plab joylarda esa 60–70 kilometr tezlikdagi kuchli shamol kuzatilganini ma’lum qildi.