“Tolibon” konstitutsiyasi loyihasi: unda nimalar nazarda tutilmoqda?
“Tolibon” harakati “Afg‘oniston Islom amirligi asosiy tamoyillari” nomli konstitutsiya loyihasini ishlab chiqqani aytilmoqda. Bu haqda “Sputnik Afganistan” xabar berdi.
Hujjat 12 bo‘lim, 79 moddadan iborat. Unda yangi hukumat qonuniyligi qasamyod va ovoz berish yo‘li bilan belgilanganishi mumkin. Mamlakat bayrog‘i oq rangda bo‘lishi qayd etilgan. Shuningdek, har juma, ikki hayit, Afg‘oniston mustaqilligi kuni, bosqinchilar mag‘lubiyati va mamlakatni tark etish kuni bayram kunlari, deb eʼlon qilingan.
Qonun loyihasida taʼlimga oid bir qancha ko‘rsatmalar ham o‘rin olgan. Xususan, barcha o‘rta maktablarda arab tili majburiy o‘qitiladi. Shu bilan birga diniy ilmlar rivojlantirilishi va madrasalar ochilishi rag‘batlantirilishi belgilangan.
Pushtu va dari davlatning rasmiy tili sifatida tanlab olingan. Shuningdek, pushtu Afg‘onistonning “milliy til”i maqomiga ega bo‘ladi. Qonunda mamlakatda majburiy harbiy xizmat joriy etilishi to‘g‘risida band bor. Bundan tashqari Afg‘onistonning barcha fuqarosi teng huquqlarga egaligi mustahkamlab qo‘yilgan.
Maʼlumot o‘rnida: 15 avgust kuni “Tolibon” harakati Kobulni egallagan. 31 avgustda AQSH Afg‘onistonni to‘liq tark etdi. Harakat tomonidan egallanmagan yagona hudud — Panjsher edi. Ammo 6 sentyabrda ushbu hudud ham “Tolibon” nazoratiga o‘tdi. Shundan keyin toliblar 7 sentyabr kuni mamlakatning yangi hukumati tuzilganini eʼlon qildi.
Jahongir Qo‘ziyev
