O‘zbekistonda gipermarket va supermarket maqomida ikkita do‘kon ochiladi
Qozog‘istonda eng yirik chakana savdo tarmog‘i hisoblanadigan “Magnum Cash & Carry” O‘zbekistonda 2021 yilning dekabr oyi boshida ikkita do‘kon ochadi. Bu haqda kompaniya boshqaruvi raisi Azamat Osmonov “K21:Kazakhstan Growth Forum”ida maʼlum qildi, deb xabar beradi “Kapital.kz”.
Tashkilot raisining so‘zlariga ko‘ra, bu do‘konlar gipermarket va supermarket maqomida bo‘ladi.
U, shuningdek, “Magnum Cash & Carry” tarmog‘i uchun O‘zbekiston bozoriga kirish ustuvor vazifa ekanini aytgan. Chunki rus savdo markalari Qozog‘iston bozorida ustunlik qilayotgani, ular bilan mahalliy chakana sotuvchilar imkoniyati teng emasligini taʼkidlagan.
O‘zbekiston bozoriga chiqish rejalari o‘tgan yilning kuzida maʼlum bo‘lgan edi. Maʼlumotlarga ko‘ra, kompaniya 2021 yilda Toshkentda oltita do‘kon ochishni reja qilgan bo‘lib, har bir joy uchun investitsiyalar hajmi 5 million dollarni tashkil etadi.
Kompaniya xaridorlarga boshqa mamlakatlardan olib kelinadigan hamda O‘zbekiston va Qozog‘istonda ishlab chiqariladigan keng turdagi tovarlarni taklif qilishni maqsad qilgan. Shu bilan birga, savdo tarmog‘i “Magnum Club” bonus dasturini ham ishga tushirmoqchi.
Olamgir Abdiyev
