O‘zbekistonda COVID-19‘ga qarshi 12 yoshdan katta bolalar ham ixtiyoriy emlanadi
Mamlakatimizda endi 12 yoshdan katta bolalarga ham COVID-19‘ga qarshi Pfizer vaksinasi bilan ixtiyoriy ravishda emlashnishga ruxsat berildi.
Koronavirusga qarshi Pfizer vaksinasining 12-15 yoshdagi bolalarda o‘tkazilgan klinik sinovlarining natijalari mazkur vaksinaning yuqori darajada samaradorligi va xavfsizligini ko‘rsatdi.
Jahon sog‘liqni saqlash tashkiloti tomonidan 12 yoshdan yuqori bolalarni va o‘smirlarni Pfizer vaksinasi bilan emlash tavsiya etildi.
O‘zbekiston Respublikasi Bosh davlat sanitariya vrachi va milliy texnik immunologik ekspert komissiyasi qaroriga asosan, yurtimizda ota-onalar va vasiylarining roziligi asosida, ixtiyoriy ravishda 12 yoshdan katta bolalarni Pfizer vaksinasi bilan emlash imkoniyati mavjud.
Demak bizning yurtimizda ham 12 yoshdan katta bolalar shifokor ko‘rigidan o‘tgach, koronavirusga qarshi Pfizer vaksinasi bilan emlanishi mumkin.
Maʼlumot uchun, shu yil 13-sentabr kuni mamlakatimizga 1 200 000 doza Pfizer/BioNTech vaksinasi olib kelingan.
Ayni kungacha mamlakatimizda jami 19 969 345 doza vaksinadan foydalanildi. Shu kungacha to‘liq emlangan fuqarolar 4 283 645 nafarni tashkil qilmoqda.
Bundan avval O‘zbekistonda “Sputnik V”ni qabul qilish oralig‘i va uning ikkinchi komponentlari qachon keltirilishi maʼlum bo‘lgani haqida xabar berilgandi.
Cho‘lponoy Ahmedova
