Tabiiy gaz endi ogohlantirishsiz o‘chirilmaydi
Hozirgi kunda ko‘plab fuqarolar murojaatlarida tabiiy gaz bilan bog‘liq muammolar dolzarbligicha qolmoqda. Endilikda tabiiy gaz ogohlantirishsiz o‘chirilmaydi. Bu haqda AOKAda o‘tkazilgan matbuot anjumanida “Hududgaztaʼminot” AJ boshqarma boshlig‘i Bahodir Vahobov maʼlum qildi.
“Hozirgi kunga qadar ikki millionga yaqin xonadonga elektron gaz hisoblagichlar o‘rnatildi. Barcha isteʼmolchilarning telefon raqamlari bazaga kiritilgan. Agarda isteʼmolchida qarzdorlik aniqlansa, unga albatta, xabarnoma yuboriladi va qarzni to‘lash uchun besh kun muddat beriladi".
Elektron gaz hisoblagichlar o‘rnatilmagan xonadonlar egalarining raqamlari ham bazaga kiritilgan va ularda ham qarzdorlik mavjud bo‘lsa, tabiiy gaz o‘chirilishi haqida ogohlantiriladi.
“Ilgari gaz ogohlantirishsiz o‘chirilardi. Endi bunday holat bo‘lmaydi. Favqulodda holatlarda esa aholi mahalliy hokimlik organlari orqali xabardor qilinadi”, — deydi B.Vahobov.
Avvalroq Prezident gaz bo‘yicha odamlarning noroziligi hamda strategik tashkilotlarga gaz uchun oshirilgan koeffitsiyent bekor qilingani haqida xabar berilgandi.
Cho‘lponoy Ahmedova
