Jahon chempionatida og‘ir atletikachilarimiz dastlabki oltin medalni qo‘lga kiritdi
Saudiya Arabistonning Jidda shahrida o‘tkazilayotgan og‘ir atletika bo‘yicha o‘smirlar o‘rtasidagi jahon chempionatida terma jamoamiz ilk oltin medalni qo‘lga kiritdi.
-73 kg vazn toifasida ishtirok etgan Diyorbek Ermatov dast ko‘tarish mashqida 132 kg natija bilan ushbu yo‘nalishda tengsiz ekanini isbotladi. Shu tariqa vakilimiz dast ko‘tarish mashqida oltin medalga sazаvor bo‘ldi. Biroq siltab ko‘tarishda kichik omadsizlik sabab vakilimiz ikki kurash hisobida beshinchi pog‘onani qo‘lga kiritdi.
Eslatib o‘tamiz, mazkur chempionatda Ozoda Hojiyeva siltab ko‘tarishda bronza medal sohibi bo‘lgan bo‘lsa, ikki kurash natijasiga ko‘ra ikkinchi o‘rinni qo‘lga kiritdi. Yana bir hamyurtimiz Husinboy Matrasulov ham bronza medal sohibiga aylandi.
Avvalroq og‘ir atletika bo‘yicha jahon chempionati vakillarimiz uchun bronza medal bilan boshlangani va bokschi qizlarimiz Bolgariyadagi xalqaro turnirga yo‘l olgani haqida xabar berilgandi.
Jamshidbek Amirov
