“Safia” shirinliklar uyi asoschisi Prezidentga murojaat bilan chiqdi
Bu haqda Saidkamol Abdurazakov o‘zining Facebookdagi sahifasida eʼlon qildi. Unda shunday deyiladi:
“Assalomu alaykum, hurmatli Shavkat Miromonovich! Men “Safiya” oilaviy korxonasi asoschisi Bekzod Samigjanovman. Bu biznesni bobom 1995-yilda teshikkulcha sotishdan boshlagan. 2005-yilda esa onam Madina Ayupova “Выпечка от Мадины” shirinliklar uyini ochgan.
Sizning rahbarligingiz ostida o‘tkazilayotgan islohotlar natijasida tadbirkorlar uchun katta imkoniyatlar yaratilmoqda. Bizning korxona ham so‘nggi besh yilda katta yutuqlarga erishdi. 2016-yilga qadar xodimlarimiz soni 100 nafar va savdo uylarimiz 4 tani tashkil etgan bo‘lsa, keyingi 5 yilda 44 ta yangi savdo nuqtalari ochdik va xodimlarimiz soni 2 mingdan oshdi.
2021-yilning avgustida Prezident va tadbirkorlar o‘rtasida ochiq muloqot bo‘lib o‘tdi. Unda yuzlab tadbirkorlar, jumladan, biz ham “Eng ko‘p ish o‘rni yaratgan korxona” sifatida taqdirlandik. Siz mening onam, Madina Ayupovani O‘zbekistondagi eng taniqli tadbirkor ayollardan biri sifatida eʼtirof etdingiz. Men bundan ruhlanib, 10 ming yangi ish o‘rni yaratishga qaror qilgandim.
2018-yilda Sizning Yashnobod tumanida tadbirkorlar bilan bo‘lib o‘tgan uchrashuvingizda men ham bor edim. O‘zimning yangi qandolat fabrika loyihamni namoyish qildim va Siz yer ajratish to‘g‘risida topshiriq berdingiz.
Shundan keyin Toshkent shahar hokimi Jahongir Ortiqxo‘jayev vaziyatni nazoratga oldi. 2019-yilning 21-dekabr kuni Uchtepa tumani Foziltepa ko‘chasidan 8 sotix yer ajratib berildi. Shundan so‘ng, qurilishga ruxsat oldik. Loyihani ishlab chiqishda latviyalik mutaxassislarni jalb qildik.
Biz barcha xalqaro standartlarga javob beradigan zavod qurdik. Hozirda qo‘shni Qozog‘iston, Gruziya, Armaniston va Ozarbayjonda ham o‘z savdo nuqtalarimizni ochmoqchimiz.
Imkoniyatlardan to‘liq foydalanishga harakat qilib, 3 qavatli, umumiy maydoni 15 ming kvadrat metr bo‘lgan zavod qurdik. Zavod qurilgan joyga shaharning turli chekkalaridan uzoq yillar davomida chiqindi olib kelingan. Biz 18 metr qalinlikdagi qurilish chiqindilarini kovlashga majbur bo‘ldik. Chiqindilarni olib chiqib tashlash uchun 15 ming yuk mashinasi ishlatildi.
2016-yilda Madaniyat vazirligi tomonidan ushbu yer maydoni “Madina-Muxlisa” MCHJga ijara asosida foydalanishga berilgan. 2018-yil 10-mayda Sizning Uchtepa tumaniga qilgan tashrifingizda loyiha asosida tadbirkorlarga samarasiz ishlatilayotgan yerlarni ajratish to‘g‘risida topshiriq berdingiz. Shundan keyin Vazirlar Mahkamasining ushbu yer maydonini Toshkent shahar yer rezerviga olish to‘g‘risida qarori chiqdi. Muddat o‘tganiga qaramay, deyarli ikki yildan so‘ng bizning zavod amalda qurilishi tugallangandan keyin yuqoridagi MCHJ Toshkent shahar hokimligini sudga bergan. 1- va 2 instansiya sudlarida hokimiyat g‘olib bo‘ldi. Ammo afsuski, 2021-yil 15-sentabr kuni Oliy sud bosqichida bo‘lib o‘tgan jarayonda sud hech qaysi holatga qaramasdan Madaniyat vazirligi foydasiga qaror chiqardi. Sud qaroriga asosan biz endi o‘z hisobimizdan qurilgan zavodni buzishimiz kerak. U 4 ming yangi ish o‘rni yaratishi mumkin.
Bu qanday yuz berganini haligacha tushunolmayapman. Qurilish uchun 40 milliard so‘m sarfladik. Uning katta qismini Islom banki lizingi tashkil etadi. Keyingi oydan zavodni ishga tushirishni rejalashtirgandik. Chunki 2022-yilning yanvaridan boshlab lizing qarzi to‘lanishi boshlanishi kerak. Nima qilishni bilmayman. Bunday holatda lizingni ham, ijarani ham to‘lay olmayman. Bankrot bo‘lishdan o‘zga chora yo‘q. Birgina qaror ortidan 25 yillik mehnatimiz yo‘qqa chiqmoqda. Bizga yordam berishingizni iltimos qilamiz!
