Sambo bo‘yicha jahon chempionatini hamyurtlarimiz muvaffaqiyatli boshladi
Bugundan boshlab Gretsiyaning Saloniki shahrida sambo bo‘yicha yoshlar va o‘smirlar o‘rtasida jahon chempionatiga start berildi.
Musobaqaning dastlabki kungi bellashuvlarida jami 7 nafar hamyurtimiz g‘oliblik uchun gilamga chiqdi. Quvonarlisi, ularning barchasi yakunda shohsupaga ko‘tarilishga muvaffaq bo‘ldi. Jumladan, yakuniga yetgan bugungi bellashuvlarda o‘smirlardan Egambergan Iskandarov (-53 kg) hamda Gulhayo Jo‘rayeva (-50 kg) oltin medal sohibiga aylandi. Yana bir hamyurtimiz Eʼzoza Abdumo‘minova esa (-47 kg) kumush medalni qo‘lga kiritdi.
Behruz Omonov, Shaxzoda Azatova, Murod Erkinov va Dilrux Asliddinova esa bronza medali sohibi bo‘ldi.
Avvalroq sambochilarimiz Tataristondan uchta medal bilan qaytgani va triatlon bo‘yicha Osiyo kubogi yakuniga yetgani haqida xabar berilgandi.
Jamshidbek Amirov
