15 sutkaga qamalgan bloger faoliyatini nega to‘xtatdi?
YouTube tarmog‘ida Bobur G‘aniyev ismi bilan tanilgan avtobloger o‘z faoliyatini yakunlaganini eʼlon qildi. U rolikdagi so‘zlarini quyidagicha boshladi:
— Bugun 2021-yil 17-oktabr. Hammalaringizga eslatib o‘taman, yurtdoshlar. Mening maqsadim qonuniylikni targ‘ib qilish edi. Lekin, afsuski, bittasi aytgan ekan. “Hamma qonuniy narsa adolatli emas, hamma adolatli narsa qonuniy emas”.
Joriy yilning 30-sentabr kuni soat 22:30 atrofida Uchtepa tumanida o‘tkazilgan reydda YPX xodimlari tomonidan “Epica” avtomobili to‘xtatilib, tekshirilganda mashinada yo‘lovchi sifatida kelayotgan G‘aniyev holatni videoga olib, YPX xodimlarini “ment” deya haqorat qilgani aytiladi. Shuningdek, uning YPX xodimlariga bo‘ysunmagani ham taʼkidlangan. Shundan so‘ng haydovchi va avtobloger tuman IIO FMB ga olib ketilgan edi.
Jinoyat ishlari bo‘yicha Uchtepa tuman sudi Bobur G‘aniyev va uning sheriklari — Abrorbek Qo‘ziboyev (“Epica” haydovchisi), Obid Salimov (yo‘lovchi)ga nisbatan hukm o‘qigan.
Unga ko‘ra, YPX inspektorlarini “ment” deya haqoratlagani uchun Bobur G‘aniyev MJtKning 41-moddasi bilan aybli deb topilgan hamda BHMning 20 baravari miqdorida jarimaga tortilgan. Bundan tashqari unga MJtKning 194-moddasi bilan BHMning 1 baravari miqdorida jarima va MJtKning 195-moddasi bilan 15 sutka qamoq jazosi tayinlandi.
Uning sheriklari ham jarima va 15 sutkaga maʼmuriy qamoq jazosini olgan.
17-oktyabrga o‘tar kechasi avtobloger ozodlikka chiqdi. Vaziyatni kuzatib borayotganlar uning yana faoliyatini davom ettirishiga umid qilgan edi. Biroq Bobur G‘aniyev boshqacha qarorda ekanligini ertasi kuni o‘z muxlislariga qilgan videomurojaatida aytib o‘tdi. Shuningdek, Bloger hovlisida o‘sha muddat oralig‘ida kiygan kiyimlarini yoqib yubordi.
— Eski xotiralar, negativ xotiralarni yo‘q qilish maqsadida 30-sentabrdan 17-oktabrgacha ustimda bo‘lgan kiyimlarni yoqib yubordim, – deydi G‘aniyev.
Shundan so‘ng u oxirgi qarorini ham izohlab o‘tgan:
“Hurmatli yurtdoshlar men bir biznes boshladim. Shuning uchun Youtubedagi ishimni yuritishga vaqtim bo‘lmaydi. Meni to‘g‘ri tushunasizlar degan umiddaman”.
Lekin ko‘pchilikda "nega u blogerlikni tashladi, uni kim bunga majbur qildi?", — degan savollar ham paydo bo‘layotgani sir emas. Chunki uning hatti-harakatlari va gap-so‘zlaridan buni anglash qiyin emas...
Bundan avval avtobloger ozodlikka chiqqani haqida xabar berilgandi.
Olamgir Abdiyev
