Qishki Olimpiya o‘yinlari mashʼalasi yoqildi
Bugun Gretsiyaning qadimiy Olimpiya shaharchasida “Pekin-2022” qishki Olimpiya o‘yinlari mashʼalasi yoqildi.
Ushbu tadbirda Gretsiya Prezidenti Katerina Sakellaropulu, Xalqaro Olimpiya Qo‘mitasi Prezidenti Tomas Bax, Gretsiya Milliy Olimpiya qo‘mitasi rahbariyati va jahon sportining taniqli vakillari ishtirok etdi.
Pandemiya sabab mazkur marosim muxlislarsiz o‘tkazildi. Gretsiya MOQning maʼlum qilishicha, mashʼala estafetasini tog‘ chang‘isi bo‘yicha taniqli grek sportchisi Ioannis Antoniu boshlab beradi. Shundan so‘ng qadimiy Panatinaikos stadionida mashʼalani bo‘lajak Olimpiada mezboni – Pekin shahri mutasaddilari va musobaqa tashkiliy qo‘mitasi vakillari qabul qilib oladi.
Maʼlumotga ko‘ra, ushbu tadbirga ham tomoshabinlar kirishi man etiladi. Tomas Bax boshchiligida o‘tadigan marosimga akkreditatsiyadan o‘tgan 200 nafar shaxs kira oladi. Mashʼala 19-oktabr kuni Pekinga olib ketiladi.
Eslatib o‘tamiz, qishki Olimpiya o‘yinlari 2022-yilning 4-20 fevral kunlari bo‘lib o‘tadi.
Avvalroq Rossiya vaksinalari bilan emlangan sportchilarga ham qishki Olimpiyadada ishtirok etishga ruxsat berilgani va Xalqaro Paralimpiya qo‘mitasi prezidenti O‘zbekistonga kelgani haqida xabar berilgandi.
Jamshidbek Amirov
