Toshkent shahrining qadimiy 12 ta darvozasi qayta tiklanadi
18-oktabr kuni Toshkent shahri hokimi Jahongir Ortiqxo‘jayev poytaxtning 12 ta qadimiy darvozasini tiklash va uning joylashgan koordinatalarini tasdiqlash to‘g‘risidagi qarorni imzoladi.
Avvalroq Toshkent shahar hokimligining Raqamli rivojlanish departamenti direktori o‘rinbosari Kamoliddin Fayzullayev eski shahar qalʼasining 12 darvozasi va O‘rdaning joylashgan o‘rni qidirilayotganligi haqida aytib o‘tgandi.
Qayd etilishicha, mazkur obyektlarning aniq joylashuvini kartografik arxiv materiallarini bugungi kundagi joyga geografik bog‘lash orqali aniqlash imkonini berish uchun 1866-1872, 1890, 1912, 1977 va 2019 yillarda yaratilgan xaritalardan foydalanilgan.
Shuningdek, Eski shahar qalʼasining devori va 12 darvozasi hamda O‘rdaning tarixi aks etgan maʼlumotlar Toshkent shahar hokimligining Raqamli rivojlanish departamenti “his.tashkent.uz” interaktiv platformasida bir yarim asrga taalluqli xaritalar joylashtirildi.
Toshkent shahar hokimligi qoshidagi “Raqamli rivojlanish departamenti” MCHJ tomonidan Toshkent shahrining 12 ta qadimiy darvozalarining koordinatalari aniqlangan. Bu uchun arxiv xaritalari zamonaviy xaritalarga bog‘langan.
Maʼlumot o‘rnida, qadimiy darvozalarni qayta tiklash va qurish bo‘yicha loyiha ishlab chiqilishiga uch oy muddat berilishi rejalashtirilgan. Buyurtmachi etib – Toshkent shahar hokimligi “Yagona buyurtmachi xizmati” injiniring kompaniyasi belgilanmoqda.
Bosh loyihachi va bosh pudrat tashkilotlari esa qonunchilikda belgilangan tartibda tender (tanlov) o‘tkazish yo‘li bilan aniqlanadi.
Qadimiy darvozalarini qurish ishlarini moliyalashtirish manbalari Xalq deputatlari Toshkent shahar Kengashida ko‘rib chiqiladi.
Cho‘lponoy Ahmedova
