Yevropa futbol oqshomida qanday natijalar qayd etildi?
Kecha Yevropa maydonlarida Chempionlar ligasining navbatdagi uchrashuvlari bo‘lib o‘tdi. Unda muxlislar bir qator asosiy va qiziqarli bahslarning guvohi bo‘ldi.
Xususan, eng qiziqarli o‘yinlardan biri “Liverpul” — “Atletiko” jamoalari ishtirokida bo‘lib o‘tdi. Dastlab ikkita to‘p bilan oldinga chiqib olgan ingliz klubi keyinchalik ikkita to‘p o‘tkazib yubordi. Ikkinchi bo‘limda “Atletiko” hujumchisi Antuan Grizman maydondan chetlatilganidan so‘ng “Liverpul” raqib darvozasini yana bir bor ishg‘ol qildi.
Shu tariqa ingliz jamoasi 9 ochko bilan guruhda yetakchilik qilayotgan bo‘lsa, “Atletiko” 4 ochko bilan ikkinchi pog‘onadan joy oldi. Guruhning “Milan” — “Portu” uchrashuvida esa “Portu” klubi 1:0 hisobda g‘alaba qozondi va guruhda uchinchi o‘ringa ko‘tarildi. “Milan” hozircha umuman ochko jamg‘ara olmagan.
Kecha, shuningdek, “PSJ” — «RB Leypsig» o‘yini ham qarama-qarshiliklarga boy bo‘ldi. O‘yinning birinchi bo‘limi 1:1 hisobida yakunlanganidan so‘ng, ikkinchi bo‘lim boshida nemislar hisobda oldinga chiqib olishga muvaffaq bo‘ldi. Biroq Messining 67 va 74-daqiqada kiritgan gollari Parij klubiga g‘alaba keltirdi.
Guruhning ikkinchi o‘yinida "Manchester Siti" “Bryugge” ustidan 5:1 hisobida ustun keldi. Mazkur guruhda “PSJ” 7 ochko bilan birinchi bo‘lib turgan bo‘lsa, "Manchester Siti" 6 ochko bilan ikkinchi, “Bryugge” 4 ochko bilan uchinchi o‘rindan joy olgan. "RB Leypsig" hisobida hozircha umuman ochko yo‘q.
Shuningdek kecha “Inter” — “Sherif”ni 3:1 hisobida mag‘lub etgan bo‘lsa, guruhning ikkinchi o‘yinida "Real Madrid" “Shaxtyor” jamoasidan 5:0 hisobida ustun keldi. Bu guruhda “Sherif” va "Real Madrid" 6 ochko bilan birinchi, ikkinchi o‘rinlarni band etgan bo‘lsa, “Inter” 4 ochko bilan uchinchi, “Shaxtyor” 1 ochko bilan to‘rtinchi o‘rindan joy olgan.
Bundan tashqari kecha oqshom “Beshiktosh” — "Sporting" o‘yinida 1:4 hisobi qayd etilgan bo‘lsa, “Ayaks” "Borussiya D"ni yirik 4:0 hisobida mag‘lub etdi. Shu tariqa mazkur guruhda “Ayaks” 9 ochko bilan yetakchilik qilmoqda. "Borussiya D" 6 ochko bilan ikkinchi, “Sporting” 3 ochko bilan uchinchi pog‘onadan joy olgan. “Beshiktosh” hozircha umuaman ochko jamg‘ara olmagan.
Bugun Yevropa chempionlar ligasining qolgan uchrashuvlari bo‘lib o‘tadi.
Jamshidbek Amirov
