Moliyaviy oqimlarni yaxshilash uchun mamlakatdagi investision muhitni yaxshilash kerak
Bugun, 21 oktabr kuni Xalqaro media-xollda "Qulay ishbilarmonlik muhiti: qanday qilib O‘zbekiston moliyaviy oqimlarning mintaqaviy markaziga aylanishi mumkin?" mavzusida munozara bo‘lib o‘tdi. Unda vazirlik va tashkilot vakillari, tadbirkorlar ishtirok etdi.
Moliyaviy oqimlarni yaxshilash uchun, eng avvalo, mamlakatdagi investitsion muhitni yaxshilash kerak. Tadbirda so‘zga chiqqan Investisiyalar va tashqi savdo vaziri o‘rinbosari Laziz Qudratov ham so‘nggi besh yillikda Respublikada investision muhitni yaxshilash uchun qilingan ishlar yuzasidan maʼlumot berdi.
Xususan, respublikaga kirib kelish so‘nggi yilarda yana-da osonlashdi. Hozirda O‘zbekistonga 90 dan ortiq mamlakat fuqarolari vizasiz kirishlari mumkin. Shu bois ham O‘zbekiston MDH doirasida eng liberal viza siyosatini joriy etganligi bilan ajralib turadi.
Shuningdek, respublikada so‘nggi yillarda investorlar huquqini himoya qilish bo‘yicha muhim o‘zgarishlar sodir bo‘ldi. Ulardan biri –– investorlar masalalari bo‘yicha Oliy Sudda maxsus xayʼat tashkil etilganidir. Endilikda ular Oliy sudga to‘g‘ridan-to‘g‘ri murojaat qilishi mumkin.
Bundan tashqari, 2022-yil martida O‘zbekistonda I investision forum bo‘lib o‘tishi belgilangan. Bu orqali investorlarni jalb qilish yana-da kengayishi mumkin.
Tadbirda yana bir spiker – O‘zbekiston Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil Dilmurod Kasimov respublikada ishbilarmonlik muhiti yaxshilanganiga eʼtibor qaratdi.
Munozara ishtirokchilaridan biri – korzinka.uz asoschisi Zafar Hoshimov ham so‘nggi yillarda tadbirkorlarning tom maʼnoda mavqei ko‘tarilganini taʼkidladi.
“Uzoq yillar davomida tadbirkorlarga yetarli eʼtibor berilmadi. Ammo so‘nggi besh yilda tadbirkorlarning mavqei jamiyat orasida ham, davlat siyosatida ham ko‘tarildi”, – dedi tadbirkor.
Maʼlumot uchun: 2020 yilda pandemiyaga qaramay, O‘zbekistonda 195 mingta yangi ish o‘rni yaratildi. Bu yilning dastlabki to‘qqiz oyida esa, bu ko‘rsatkich 150 mingni tashkil etmoqda. Shuningdek, tadbirkorlarning 618 million dollarlik texnologik uskunasi ishga tushirilib,buning natijasida 39 mingdan ortiq yangi ish o‘rinlari yaratildi.
Jahongir Qo'ziyev
