O‘zbekiston Xalqaro tabiatni muhofaza qilish ittifoqi aʼzosi bo‘ldi
Ekologiya va atrof-muhitni muhofaza qilish davlat qo‘mitasi raisi o‘rinbosari Jusipbek Kazbekov boshchiligidagi delegatsiya Xalqaro tabiatni muhofaza qilish ittifoqining Gland (Shveysariya) shahrida joylashgan bosh qarorgohiga tashrif buyurdi.
Ularni Ittifoqning rivojlanish guruhi global direktori Enrike Lamann kutib oldi.
Tashrif doirasida O‘zbekistonning Xalqaro tabiatni muhofaza qilish ittifoqiga aʼzolikka qabul qilish marosimi bo‘lib o‘tdi. Mamlakatimiz Ittifoq safiga qo‘shilgan 92- va Markaziy Osiyo mamlakatlari orasida birinchi davlat bo‘ldi.
Uchrashuvda O‘zbekistonning qo‘riqlanadigan tabiiy hududlar va biologik xilma-xillikni saqlash sohasiga qaratilgan saʼy-harakatlari, ilmiy va xalqaro hamkorlikni rivojlantirish maqsadida Ittifoq aʼzoligiga kirishiga bo‘lgan intilishi alohida qayd etildi.
Shuningdek, bu yutuq O‘zbekistonga Global ekologik jamg‘arma (GEF) va Yashil iqlim jamg‘armasi (ZKF) dan ekologik loyihalar uchun grant mablag‘larini jalb qilishni jadallashtirish, respublikadagi ixtisoslashtirilgan muassasa va tashkilotlarning kadrlar salohiyatini mustahkamlash va rivojlantirishni qo‘llab-quvvatlash, shuningdek, tabiatni muhofaza qilish sohasidagi strategik hujjatlarni ishlab chiqishda xalqaro standartlarni qo‘llash imkoniyatini yaratadi.
Maʼlumot uchun: Xalqaro tabiatni muhofaza qilish ittifoqi bioxilmaxillikni saqlash sohasida tadqiqotlar olib boradigan, tabiat yaxlitligini saqlash va tabiiy resurslardan oqilona foydalanishga hissa qo‘shadigan dunyo miqyosidagi yetakchi tashkilot hisoblanadi.
Ittifoq 1948-yilda YUNESKO tashabbusi bilan tashkil etilgan bo‘lib, unga 91 mamlakat va 120 davlat tashkiloti aʼzo.
Eslatib o‘tamiz, bundan avval Helena Frayzer “Yuksalish” umumilliy harakatining faxriy aʼzosi bo‘lgani haqida xabar berilgandi.
Cho‘lponoy Ahmedova
