Uzluksiz taʼlim tizimida bir nechta chet tilini o‘rganish konsepsiyasi tasdiqlandi
Taʼlim sifatini nazorat qilish davlat inspeksiyasi, Maktabgacha, Xalq taʼlimi hamda Oliy va o‘rta maxsus taʼlim vazirliklarining qo‘shma qarori bilan “Uzluksiz taʼlim tizimida bir nechta chet tilini o‘rganish konsepsiyasi” tasdiqlandi.
Unga ko‘ra, ayrim fanlar chuqurlashtirib o‘qitiladigan ixtisoslashtirilgan maktablarda 5-sinfdan boshlab ikki va undan ortiq chet tillarini o‘qitish yo‘lga qo‘yiladi. Bunda o‘rgatish o‘quv rejadagi baʼzi fanlarni xorijiy tillarga o‘tkazish hisobiga amalga oshiriladi. Shuningdek, maktab-internat va ijod maktablarida ham bu tizim tadbiq qilinadi. Bunda mazkur tizim 7-sinfdan boshlanadi.
Uzluksiz taʼlim tizimida chet tillarini o‘rganishni tizimli tarzda bir nechta bosqichga bo‘lgan holda amalga oshirish ko‘zda tutilgan.
Jumladan:
- maktabgacha taʼlim tashkilotlari, umumtaʼlim maktablari, boshlang‘ich professional taʼlim muassasalari va akademik litseylarda;
- ayrim fanlar (xorijiy tillar) chuqurlashtirib o‘qitiladigan ixtisoslashtirilgan maktablarda 5- dan 11-sinfgacha, ayrim fanlar (xorijiy tillar) chuqurlashtirib o‘qitiladigan maktab-internat va ijod maktablarida esa 7- dan 11-sinfgacha bo‘lgan davrda; qo‘shimcha tarzda, akademik litseylarning xorijiy til chuqurlashtirib o‘qitiladigan taʼlim yo‘nalishlarida;
- oliy taʼlim muassasalarining 1-2-kurslarida kasbiy vaziyatlarda qo‘llashni o‘rganish bosqichiga ko‘tariladi. Bunda chet tilini o‘rganish avvalgi bosqichda o‘qigan chet tillarini davom ettirgan holda olib boriladi.
Konsepsiyaning asosiy maqsadi:
- taʼlim oluvchilarning lingvistik barqaror va uzluksiz rivojlanishi uchun qulay shart-sharoitlarni yaratish;
- taʼlim oluvchilarning istalgan darajada chet tilida muloqot qilish qobiliyatini shakllantirish. Ularga boshqa madaniyat va urf-odat vakillari bilan teng huquqli muloqot qilish imkoniyatini berish;
- taʼlim oluvchilarni turli sohalarda va madaniyatlararo erkin muloqotga kirishishiga imkon yaratishdan iborat.
Bundan avval chet tillarni o‘qitish bo‘yicha yaxshi natijalarga erishgan maktablar rag‘batlantirilishi hamda Prezident maktabi bitiruvchilari davlat OTMlariga imtihonsiz grant asosida qabul qilinishi haqida xabar qilingandi.
Olamgir Abdiyev
