5 yillik ish stajiga ega fuqarolarga oliygohga tavsiyanoma beruvchi tashkilotlar ro‘yxati tasdiqlandi

Oliy ta’lim, fan va innovatsiyalar vazirligi iqtisodiyot tarmoqlarida kamida 5 yil ish stajiga ega fuqarolarni davlat oliy ta’lim muassasalarining kechki ta’lim shakliga tavsiya etish huquqiga ega vazirlik, idora va yirik xo‘jalik birlashmalari ro‘yxatini tasdiqladi.

 

Tasdiqlangan ro‘yxatdan jami 87 ta vazirlik, idora, davlat organi, agentlik, uyushma va yirik korxonalar o‘rin olgan. Ular qatorida Oliy Majlis Senati, Qonunchilik palatasi, Prezident administratsiyasi, Vazirlar Mahkamasi, shuningdek, Adliya, Sog‘liqni saqlash, Ichki ishlar, Mudofaa, Energetika, Raqamli texnologiyalar hamda Oliy ta’lim, fan va innovatsiyalar vazirliklari bor.

 

Bundan tashqari, Markaziy bank, tijorat banklari, Soliq qo‘mitasi, Bojxona qo‘mitasi, Milliy statistika qo‘mitasi, “O‘zbekneftgaz”, “O‘zbektelekom”, “O‘zavtosanoat”, “O‘zbekiston temir yo‘llari”, Navoiy va Olmaliq kon-metallurgiya kombinatlari, “Hududiy elektr tarmoqlari”, “O‘zgidroenergo” va “O‘zsuvta’minot” ham tavsiyanoma berish huquqiga ega tashkilotlar qatoriga kiritilgan.

 

Qayd etilishicha, ushbu tashkilotlarning tavsiyanomasiga ega abituriyentlar davlat oliy ta’lim muassasalari bakalavriatining kechki ta’lim shakliga suhbat natijalariga ko‘ra tabaqalashtirilgan to‘lov-kontrakt asosida o‘qishga qabul qilinadi.

 

Ma’lumot o‘rnida, 17-iyul kuni Ta’lim tashkilotlariga qabul qilish bo‘yicha davlat komissiyasi 2026/2027-o‘quv yili uchun davlat oliy ta’lim muassasalariga qabul parametrlarini tasdiqlagan. Bakalavriat va magistratura bosqichlari uchun qabul kvotalari, davlat grantlari hamda maqsadli qabul ko‘rsatkichlari ham belgilangan.