“Kelajak uchun xorijiy til” loyihasi doirasida 10 mingdan ortiq o‘quvchi milliy sertifikat oldi
40 mingga yaqin 11-sinf o‘quvchisining xorijiy til bo‘yicha bilim va ko‘nikmalari oshirildi.
Toshkent shahrida amalga oshirilayotgan “Kelajak uchun xorijiy til” loyihasi doirasida 10 ming nafardan ortiq 11-sinf o‘quvchisi ingliz tili bo‘yicha B1 va undan yuqori darajadagi milliy sertifikatni qo‘lga kiritdi. Bu haqda Maktabgacha va maktab ta’limi vaziri E’zoza Karimova ma’lum qildi.
Qayd etilishicha, loyiha 2025-yil dekabr oyidan boshlab poytaxtdagi barcha umumta’lim maktablarida yo‘lga qo‘yilgan. “Toshkent tajribasi” sifatida amalga oshirilgan loyiha doirasida 40 mingga yaqin 11-sinf o‘quvchisining xorijiy til bo‘yicha bilim va ko‘nikmalari oshirilgan.
Dastlab o‘quvchilarning til bilish darajasini aniqlash maqsadida MOCK imtihonlari o‘tkazilgan. Natijalarga ko‘ra, ular bilim darajasiga qarab guruhlarga ajratilib, xorijiy mutaxassislar ishtirokida bepul mashg‘ulotlar tashkil etilgan.
Shuningdek, Bilim va malakalarni baholash agentligi bilan hamkorlikda o‘quvchilar xorijiy tillarni bilish darajasini aniqlash bo‘yicha milliy sertifikat sinovlaridan o‘tkazilgan. Natijada Toshkent shahridagi 10 106 nafar 11-sinf o‘quvchisi ingliz tili bo‘yicha B1 va undan yuqori darajadagi milliy sertifikatni qo‘lga kiritgan.
Vazirning ta’kidlashicha, 2025-yil dekabr oyida xorijiy til sertifikatiga ega o‘quvchilar soni 2 970 nafarni tashkil etgan bo‘lsa, 2026-yil 1-iyul holatiga ko‘ra bu ko‘rsatkich 17 515 nafarga yetgan.
Bundan tashqari, 2025–2026-o‘quv yili davomida respublika bo‘ylab 1 518 nafar xorijiy til mutaxassisi jalb etilgan. Yangi o‘quv yilidan boshlab ularning sonini 2 ming nafardan oshirish rejalashtirilgan.
Bilim va malakalarni baholash agentligi ma’lumotlariga ko‘ra, 2026–2027-o‘quv yili uchun oliy ta’lim muassasalariga hujjat topshirgan chet tillari bo‘yicha milliy yoki xalqaro sertifikatga ega abituriyentlar soni 125 ming 354 nafarni tashkil etmoqda.
Shuningdek, barcha fanlardan milliy yoki xalqaro sertifikatga ega qariyb 13 ming nafar abituriyent kirish test sinovlaridan ozod qilingan.
